دەپۋتات داتى: جۇمىسى كوپ، جالاقىسى از مۇعالىمنىڭ سورى – سايلاۋ مەن سەنبىلىك

ءماجىلىس دەپۋتاتى يرينا سميرنوۆا الداعى جىلى قولدانىلىسقا تۇسەتىن 19 باپتان تۇراتىن «پەداگوگ مارتەبەسى تۋرالى» زاڭ جوباسىنا قاتىستى تولىقتىرۋلار ەنگىزۋ قەرەكتىگىن ايتتى.

«پەداگوگتار كاسىبي قىزمەتىنە قاتىسى جوق مىندەتتەمەلەرگە بويۇسىنىپ ءجۇر.  بۇگىنگى تاڭدا ولاردىڭ جۇمىسى كوپ، جالاقىسى از. بىزگە زاڭ ارقىلى مۇعالىمدەردى سەنبىلىكتەرگە، سايلاۋالدى ۇگىت-ناسيحات جۇمىستارىنا تارتۋعا تىيىم سالۋ جانە جالاقىلارىن جوعارىلاتۋعا قول جەتكىزۋ قاجەت. مۇعالىمدەردى كاسىبي قىزمەتىنەن تىس جۇمىسقا جۇمىلدىرعان ازاماتتاردى اكىمشىلىك جاۋاپكەرشىلىككە تارتۋ ماسەلەسى نازاردان تىس قالماۋعا ءتيىس.  زاڭسىزدىققا جول بەرگەندەر 20-دان 120 ايلىق ەسەپتىك كورسەتكىشكە دەيىن ايىپپۇل تولەۋى كەرەك»،  – دەدى دەپۋتات.

سميرنوۆانىڭ سوزىنشە،  «مۇعالىمنىڭ سورى – سايلاۋ مەن سەنبىلىك».  «ۇستاز بەن شاكىرت كوشە كەزبەي، ءدارىسحانادا وتىرۋى كەرەك» دەگەنىنە قاراماستان، قازاقستاندا ۇنەمى سايلاۋ، ساناق، اۋقىمدى ءىس-شارالار پەداگوگتاردىڭ جۇگىرىسىمەن ىسكە اسىرىلاتىنى جاسىرىن ەمەس. بۇعان بيىلعى قازاقستان پرەزيدەنتىن ايقىنداۋ ءۇشىن وتكىزىلگەن كەزەكتەن تىس سايلاۋ دا دالەل بولا الادى. الەمجەلىدە كەڭ تاراعان سايلاۋ بارىسىنىڭ بەينەماتەريالدارىنان زىر جۇگىرگەن مۇعالىمدەردىڭ ايانىشتى ءحالىن كورۋگە بولادى.

دەپۋتات ۇسىنىسىنا ۆەدومستۆو ء(بىلىم جانە عىلىم مينيسترلىگى) وكىلى عالىمجان جۇماشەۆ اتالعان قۇقىق بۇزۋشىلىقتار بويىنشا مينيسترلىك جانىنداعى باقىلاۋ دەپارتامەنتىنە نەمەسە «تىكەلەي جەلىگە» ارىز-شاعىم تۇسسە، ماماندار ماسەلەنىڭ اق-قاراسىن انىقتاپ، ناقتى شارا قولداناتانىن ايتىپ، جاۋىر بولعان ماسەلەدەن باسىن الىپ قاشۋعا تىرىستى.

«مۇعالىم ءوز مىندەتىن ورىنداۋى كەرەك. ونىڭ مىندەتى تايعا تاڭبا باسقانداي كورسەتىلگەن. ول وقۋشىلارىن ەرتىپ، اكىمدەرمەن بولاتىن كەزدەسۋگە، سەنبىلىككە، سايلاۋعا بارۋعا ءتيىستى ەمەس. ول قالالىق مەرەكەلەرگە باسشىلىقتىڭ كۇشتەۋىمەن كەلمەۋى كەرەك، – دەيدى دەپۋتات. دەپۋتاتتىڭ داتى: مۇعالىم ساپالى ءبىلىم مەن تاعلىمدى تاربيەمەن عانا اينالىسىپ، باسى ارتىق باسقا شارۋالار مەن كەز كەلگەن شارا ءۇشىن قوسىمشا تولەم جۇرگىزىلۋى شارت.

"The Qazaq Times"