جاپونيا مەن رەسەي كۋريل ارالدارىنا قاتىستى داۋعا نۇكتە قويۋ ءۇشىن كەزەكتى مارتە بىرلەسكەن كەلىسسوزدەر جۇرگىزبەك. بۇل تۋرالى باسىلىمى جاپون سىرتقى ساياسات بولىمىنە سىلتەمە بەرگەن «The Guardian» باسىلىمى حابارلادى.

جاپونيا سىرتقى ىستەر ءمينيسترىنىڭ ورىنباسارى تاكەو موري 6 قاراشادا ماسكەۋدە ءوزىنىڭ رەسەيلىك ارىپتەسى يگور مورگۋلوۆپەن بەيبىت كەلىسىمشارتتىڭ ماسەلەلەرىن، سونداي-اق كۋريل ارالدارىنىڭ وڭتۇستىك بولىگىندە شارۋاشىلىق جۇرگىزۋدى تالقىلاماق.

بيىل تامىزدا كۋريل ارالدارىنا رەسەيلىك شەندىلەر باسقارۋ توبىمەن بارعاننان كەيىن، جاپونيا سىرتقى ىستەر مينيسترلىگى ماسكەۋگە نارازىلىق حاتىن جولداعان بولاتىن. بۇعان قاتىستى پىكىر بىلدىرگەن رەسەي پرەمەر-ءمينيسترى دميتري مەدۆەدەۆ: «جاپون حالقىنىڭ نارازىلىعى ءبىزدىڭ ەش الاڭداۋشىلىعىمىزدى تۋعىزبايدى. كۋريل ارالدارى رەسەي جەرىنە تيەسىلى. ارالدار ساحالين وبلىسىنا كىرەدى. سول سەبەپتى رەسەيلىكتەردىڭ ول جاققا بارۋعا تولىقتاي قۇقىعى بار»، – دەپ جاۋاپ بەردى.

ال 5 تامىزدا رەسەي اسكەرلەرىنىڭ كۋريل ارالدارى ماڭىندا (كۋناشير) اسكەري وقۋ-جاتتىعۋ وتكىزگەنىنە بايلانىستى توكيو نارازىلىق حاتىن جولداعان. الايدا، رەسەي جاپونيانىڭ بۇل جولعى نارازىلىعىن دا «نەگىزسىز» دەپ تانىدى.

جاپونيا مەن رەسەي اراسىنداعى ىنتىماقتاستىق كەلىسىمگە 70 جىلدان بەرى قول قويىلماي كەلەدى. ياعني ەكى ەل ەكىنشى دۇنيەجۇزىلىك سوعىستان كەيىن ارنايى كەلىسىمشارت جاساسقان جوق. جاپونيا جانە رەسەي 1855 جىلدىڭ 7 اقپانىندا يتۋرۋپ جانە ۋرۋپ ارالدارىنىڭ اراسىنداعى شەكارانى انىقتايتىن ءبىرىنشى ورىس-جاپون كەلىسىمشارتىنا (سيمود تراكتاتى) قول قويدى. ەكىنشى دۇنيەجۇزىلىك سوعىس كەزەڭىنەن كەيىن تاراپتار رەسمي كەلىسىمشارتقا قول جەتكىزە الماي كەلەدى. جاپونيا پرەمەر-ءمينيسترى سيندزو ابە مەن رەسەي پرەزيدەنتى ۆلاديمير پۋتين وسى ماسەلەگە قاتىستى 2012 جىلدان بەرى بىرنەشە رەت كەزدەسۋ ۇيىمداستىرعان. بىراق، كەزدەسۋلەردىڭ ەشقايسىسى وڭ ناتيجە بەرگەن جوق.

"The Qazaq Times"