اگەنتتىك: 24 شەنەۋنىك ازىق-تۇلىك رەزەرۆىنە 6 ميلليارد تەڭگە شىعىن كەلتىرگەن

مەملەكەتتىك ماتەريالدىق رەزەرۆ (ممر) سالاسىنداعى اسا ءىرى كولەمدەگى سىبايلاس جەمقورلىق فاكتىسى بەلگىلى بولدى.

سىبايلاس جەمقورلىققا قارسى ءىس-قيمىل اگەنتتىگىنىڭ ءباسپاسوز جيىنىندا دەپارتامەنت باسشىسى انار جاروۆا 6 ميلليارد تەڭگە كولەمىندە زالال كەلتىرگەن كۇدىكتىلەر ىسىنە قاتىستى تەرگەۋ اياقتالىپ، قازىر قىلمىستىق ءىس ماتەريالدارىمەن تانىسۋ ءجۇرىپ جاتقانىن حابارلادى.

ازىق-تۇلىك جەتكىزۋ بويىنشا الاياقتىق جاساعان دەگەن ايىپپەن  24 كۇدىكتى، ونىڭ ىشىندە كوميتەتتىڭ بۇرىنعى ەكى باسشىسى قىلمىستىق جاۋاپكەرشىلىككە تارتىلىپ جاتقان كورىنەدى. وسىعان دەيىن ۆەدومستۆونىڭ جۇمىس ىستەگەن كەزەڭىندە جىمقىرۋ جانە لاۋازىمدىق وكىلەتتىگىن تەرىس پايدالانعانى ءۇشىن ممرك مەكەمەسىنىڭ 5 باسشىسى قىلمىستىق جاۋاپكەرشىلىككە تارتىلعان.

ەل پرەزيدەنتىنىڭ تاپسىرماسىنا سايكەس اگەنتتىك ۇلتتىق ەكونوميكا مينيسترلىگىنە قارايتىن ممرك قىزمەتىندەگى سىبايلاس جەمقورلىق فاكتىلەرىنە سىرتقى تالداۋ جۇمىستارىن جۇرگىزگەنىن مالىمدەدى.  ونىڭ سوزىنشە، تاۋارلار مەملەكەتتىك ستاندارت تالاپتارىنا ساي بولماعان.

مەملەكەتتىك ماتەريالدىق رەزەرۆ قويماسىنا ساپاسىز ونىمدەردى جەتكىزۋ، ماتەريالدىق قۇندىلىقتاردى جاڭارتۋ تەتىكتەرىندەگى كەمشىلىك،  جۇيە الگوريتمنىندەگى  (سالۋ، ساقتاۋ، جاڭارتۋ) جەتىسپەۋشىلىك، قويما شارۋاشىلىعىنداعى ەسكىرگەن جەلى، زاماناۋي باقىلاۋ جۇيەسى جوق جانە ت.ب. بىرقاتار جۇيەلى پروبلەمالار انىقتالعان.

اگەنتتىكتىڭ پرەۆەنتسيا دەپارتامەنتىنىڭ باسشىسى انار جاروۆا:

– تالداۋ قورىتىندىسى بويىنشا ازىرلەنگەن ۇسىنىستار سىبايلاس جەمقورلىق تاۋەكەلدەرىن جويۋ بويىنشا جوسپارعا ەنگىزىلگەن. قازىرگى ۋاقىتتا ونىڭ بەلسەندى ىسكە اسىرىلۋى ءجۇرىپ جاتىر.تالداۋ كەزىندە كوميتەت تاراپىنان جانە شەشۋ جولدارىن ازىرلەۋ بارىسىندا تولىق قولداۋ مەن تۇسىنىستىك بولدى، اگەنتتىكتىڭ بارلىق ۇسىنىستارى قابىلداندى. سونىمەن قاتار، ولار جاعدايدى تۇزەتۋ بويىنشا قوسىمشا شارالار ۇسىندى، – دەدى.

"The Qazaq Times"