ورتالىق كوممۋنيكاتسيالار قىزمەتى ورتالىعىندا وتكەن ءباسپاسوز جيىنىندا دسم تاۋارلار مەن كورسەتىلەتىن قىزمەت ساپاسىن جانە قاۋىپسىزدىگىن باقىلاۋ كوميتەتىنىڭ باسشىسى ليۋدميلا بۇيرابەكوۆا باق وكىلدەرىن اتىراۋداعى اتىشۋلى پەرزەنتحاناعا تەكسەرۋ جۇرگىزگەن ارنايى كوميسسيانىڭ قورىتىندىسىمەن تانىستىردى.
اپتا باسىندا دسم جۇرگىزگەن اۋديت قورىتىندىسى بويىنشا، 2018 جىلى قازاقستاندا 277 بالا ءتىرى تۋعان، بىراق، ونى دارىگەرلەر ءولى تۋدى دەپ جازعانى انىقتالعان ەدى.
سوندا كوميتەت باسشىسى ليۋدميلا بۇيرابەكوۆا تىلشىلەرگە:
– ءبىز قازاقستاندا ءولى تۋعان نارەستەلەردىڭ 2018 جىلعى كورسەتكىشى بويىنشا اناليز جاسادىق. وسى تەكسەرۋدە ايماقتاردىڭ ستاتيستيكانى جاقسارتۋ ءۇشىن بالالار ءتىرى تۋىپ، كەيىن ءولىپ قالسا دا، ونى ءولى تۋدى دەپ ەسەپتەگەن جاعدايلاردى انىقتادىق، – دەگەن بولاتىن.
«وسى جىلدىڭ 9 ايىندا اتىراۋ وبلىسىندا 1 جاسقا دەيىنگى سابيلەردىڭ 156 ءولىمى تىركەلگەن. ونىڭ ىشىندە 98 بالا وبلىستىق پەريناتالدىق ورتالىقتا، قالعان 54-ءى باسقا مەديتسينالىق ۇيىمداردا قايتىس بولعان. 4 بالا ۇيدە كوز جۇمعان. ءسابي ءولىمىنىڭ نەگىزگى سەبەبى پەريناتالدىق كەزەڭدەگى جاعداي، ينفەكتسيالىق اۋرۋلار، تۋا بىتكەن كەمىستىكتەر، جازاتايىم وقيعالار بولىپ وتىر»، – دەدى ليۋدميلا بۇيرابەكوۆا.
جاڭا تۋعان شارانالار ءولىم-ءجىتىمىنىڭ كوبەيۋى تامىز-قىركۇيەك ايلارىندا ارتا تۇسكەن. قوعامدىق رەزونانس تۋدىرعان ماسەلەنىڭ شىنايى سەبەبىن ءبىلۋ ءۇشىن قايتىس بولعان 42 بالانىڭ مەديتسينالىق كارتاسى ەگجەي-تەگجەيلى تەكسەرىلگەن دەسەدى. ونىڭ 74%-ى 2,5 كەلىگە جەتپەيتىن سالماقپەن تۋعان.
ەپيدەميولوگيالىق تەكسەرۋلەر ناتيجەسىندە بازالىق نورماتيۆتەر مەن تازالىقتىڭ ساقتالماۋىنان ينفەكتسيا تاراعانى، سالدارىنان وتىزعا تارتا ءسابيدىڭ كوز جۇمعانى انىقتالىپ، دالەلدەنگەن.
«دەزينفەكتسيالىق، ستەريلدىك رەجيمدەر ساقتالماعان. مەكەمەنىڭ وزىندە جەكە كىر جۋ بولمەسى بولماعان. ال كەلىسىمشارت بويىنشا قىزمەت كورسەتەتىن كاسىپورىن سانيتارلىق تالاپتارعا مۇلدە ساي ەمەس ەكەنى انىقتالدى. جاڭا تۋعان نارەستەلەردى ساناۆياتسيامەن تاسىمالداۋ كەزىندە دە سانيتارلىق تالاپتار ساقتالماعان. اۋداننان وبلىسقا جەتكىزۋ كەزدە ينفەكتسيا جۇعىپ وتىرعان. تامىز-قىركۇيەك ايىندا قايتىس بولعان 42 ءسابيدىڭ 26-سى اۋرۋحانا ىشىندەگى ينفەكتسيادان كوز جۇمعانى انىقتالدى»، – دەدى ول.
بىلىكتى 26 ماماننان قۇرىلعان كوميسسيا انىقتاعان دەرەكتەردى العا تارتقان بۇيرابەكوۆانىڭ سوزىنشە، دارىگەرلەردىڭ كوبى جۇمىسىندا قولدانىلاتىن نورماتيۆتىك بازانى مۇلدە بىلمەيدى ءارى مەكەمەدە ەمدەۋ-دياگنوستيكا ءتارتىبى ساقتالماعان.
ينفەكتسيالىق باقىلاۋ تالاپتارى بۇزىلعان كورىنەدى. سايكەسىنشە 26 ءسابيدىڭ ولىمىنە سەبەپ بولعان ينفەكتسيانىڭ اۋرۋحانا ىشىندە تارالۋىنا جاۋاپتى ادامدارعا اكىمشىلىك جازا قولدانىلعان-مىس.
«ديستولوگيالىق ماتەريالدى زەرتتەۋ كەزىندە پەريناتالدىق ورتالىق ماماندارى قويعان كلينيكالىق دياگنوزداردى ساراپشىلار راستاعان جوق. 18 بالانىڭ دەنەسىنەن باكتەريالىق سەپسيس انىقتالدى. پەريناتالدىق ورتالىق قويعان كلينيكالىق جانە پاتالوگاناتوميالىق دياگنوزداردىڭ تەك 15,4%-ى عانا راستالدى. قىركۇيەك ايىندا قويىلعان دياگنوزداردىڭ 35%-ى راستالسا، قالعان 65%-ىندا دياگنوز راستالمادى. باكتەريالىق سەپسيستەن كوز جۇمعان 8 بالانىڭ دياگنوزىن پەريناتالدىق ورتالىق ماماندارى مۇلدە باسقالاي جورىعان. وسىدان-اق اۋرۋحانا ىشىندە ينفەكتسيا تاراعانىن كورۋگە بولادى. ونى شەتىنەگەن بالالاردىڭ قانى راستادى. سانيتارلىق-ەپيدەميولوگيالىق جاعدايدى باقىلاۋدا ۇستاماعاننىڭ سالدارىنان دەرت قىركۇيەككە دەيىن جالعاسقان»، – دەيدى كوميتەت باسشىسى بۇيرابەكوۆا.
ۆەدومستۆو وكىلىنىڭ ايتۋىنشا، الداعى ۋاقىتتا ەلدىڭ كۇمان-كۇدىگىن كۇشەيتكەن جۇيەلىك ماسەلەلەر نەگىزىندە رەسپۋبليكا كولەمىندە بارلىق پەرزەنتحانالارعا قاتاڭ تەكسەرۋ جۇرگىزىلمەك.
شەرزاتتىڭ ءولىمى ىسىنە قاتىستى قۇپيا ۆيدەونى جاريالاۋ كىمگە كەرەك بولدى؟ – ساراپشىلار مەديا سىنى
24 قازان – كىتاپحاناشىلار مەرەكەسى قۇتتى بولسىن!
«ۋچاسكەدەن ارۋاققا كوك حات»: الماتىدا مارقۇمعا كەلگەن شاقىرتۋ
كوميسسيا مەن باقىلاۋشى ەسەبىندەگى ايىرماشىلىق: الماتىدا رەفەرەندۋم قالاي ءوتىپ جاتىر؟
ء"ادىل قازاقستان، ەستيتىن مەملەكەت" ەندى ادۆوكاتتارعا قىسىم جاساي باستادى ما؟
«پسەۆدو-بايقاۋشى» الدە كاسىبي باقىلاۋشى: رەفەرەندۋمدى كىم باقىلايدى؟