يمپەراتوردى ۇلىقتاۋ: 170 مەملەكەت دەلەگاتسياسىن جيناعان ءراسىم

جاپونيادا جاڭا يمپەراتوردى ۇلىقتاۋ ءراسىمى ءوتىپ، وتىز جىل تاقتا وتىرعان يمپەراتور اكيحيتونىڭ ۇلى نارۋحيتو تىزگىندى ءوز قولىنا الدى.

2016 جىلدىڭ تامىزىندا يمپەراتور اكيحيتو حالىققا جولداۋىن جاريالاپ، دەنساۋلىعى مەن جاسىن مەڭزەگەن ساتتەن-اق، تاقتان تۇسەتىنى جايلى ناقتى ايتپاسا دا، بيلىكتى جاقىن ارادا مۇراگەرى نارۋحيتوعا تاپسىراتىنى بەلگىلى ەدى. بيلىك تىزگىنىن نارۋحيتو بيىل 1 مامىردا قولىنا الدى. سول كەزدە حالىققا ون كۇن دەمالىس بەرىلىپ، داستۇرگە ساي راسىمدەر وتكەن.

ۇلىقتاۋ راسىمىندە يمپەراتور نارۋحيتو سوزىندە: «وتىز جىلدان استام ۋاقىت بويى اسا مارتەبەلى، قۇرمەتتى يمپەراتور اكيحيتو حالقىنىڭ باقىتتى بولۋىن، الەمدەگى بەيبىتشىلىكتىڭ بەرىك بولۋىن تىلەدى. مەن جاپونيانىڭ بىرلىگى مەن مەملەكەتتىگىنىڭ نىشانى رەتىندە كونستيتۋتسياعا سايكەس قىزمەت اتقارامىن»، – دەدى.

بۇگىنگى جيىنعا 174 ەلدەن 400 وكىل قاتىستى. ولاردىڭ 70-ءى مونارحتار مەن مەملەكەت باسشىلارى. سونداي-اق، يمپەراتوردى قۇتتىقتاۋعا جاپون قوعامىنىڭ بارلىق توپتارىنان 1,6 مىڭعا جۋىق وكىلدەر شاقىرىلدى: بيلىكتىڭ زاڭ شىعارۋشى، اتقارۋشى جانە سوت تارماقتارىنىڭ باسشىلارى، كابينەت مۇشەلەرى جانە بۇرىنعى پرەمەر-مينيسترلەر، پرەفەكتۋر گۋبەرناتورلارى، عالىمدار، سپورتشىلار، جازۋشىلار، كاسىپكەرلەر.

قوناقتاردىڭ قاتارىندا بەلگيا، بۋتانا، يسپانيا، كامبودجا، مالايزيا، نيدەرلاندى كورولدەرى، بىرىككەن كورولدىكتىڭ مۇراگەر حانزاداسى چارلز، اۋستريا، ءۇندىستان، ۆەنگريا، فيليپپين، فينليانديا پرەزيدەنتتەرى، اقش-تىڭ كولىك ءمينيسترى ەلەين چاو، رەسەي فەدەراتسيا كەڭەسى توراعاسىنىڭ ورىنباسارى يلياس ۋماحانوۆ، قحر توراعاسىنىڭ ورىنباسارى ۆان تسيشان بار. سونىمەن قاتار، جاپونياعا ارمەنيا پرەزيدەنتى ارمەن ساركيسيان، گرۋزيا باسشىسى سالومە زۋرابيشۆيلي، قىرعىزستان پرەزيدەنتى سوورونباي جەەنبەكوۆ، ۋكراينا پرەزيدەنتى ۆلاديمير زەلەنسكي، مولداۆيا پرەزيدەنتى يگور دودون جانە قازاقستاننىڭ بۇرىنعى پرەزيدەنتى نۇرسۇلتان نازارباەۆ قاتىستى.

جاپون جۇرتىنىڭ زاڭىنا سايكەس، پاتشا وتباسىندا ساياسي بيلىك جوق. الايدا، جاپونيانىڭ ەل بىرلىگى مەن ۇلت تۇتاستىعىنىڭ سيمۆولى رەتىندە پاتشا وتباسىنا ۇلكەن قۇرمەت كورسەتىلەدى. حالىق نارازى بولعان جاعدايدا ۇكىمەتتى دە اۋىستىرۋعا قاقىسى بار.  اكيحيتو پاتشانىڭ تۇسىندا جاپون حالقى تالاي اۋىر كۇندەردى باسىنان وتكەرگەن. اكيحيتو سونىڭ بارىندە شاپاعاتشىل، حالىقشىل پاتشا رەتىندە ەستە قالعان.

نارۋحيتو – ەكىنشى دۇنيەجۇزىلىك سوعىستا توكيو كاپيتۋلياتسياسىنان كەيىن دۇنيەگە كەلگەن ءبىرىنشى جاپون مونارحى. ول توكيوجاعى «گاكۋسيۋين» ەليتالى ۋنيۆەرسيتەتىن جانە وكسفوردتى تامامداعان. جاڭا يمپەراتوردىڭ جۇبايى 55 جاسار ماساكو – جاپونيا ديپلوماتىنىڭ قىزى، توكيو ۋنيۆەرسيتەتى مەن گارۆاردتا ءبىلىم العان.

"The Qazaq Times"