بوريس بريۋسسەلدە جەڭدى. فوتو; EPA.

بريتانيانىڭ باس ءۋازىرى (پرەمەر-ءمينيسترى) بوريس جونسون (دجونسون) بريۋسسەلدەگى كەلىسسوزدە جەڭىپ شىقتى. بريتانيانىڭ ەۋروپالىق وداقتان شىعۋى تۋرالى جاڭا كەلىسىمدى قابىلداتتى. بىراق، بۇل جاڭا جوبانىڭ بريتانيا پارلامەنتىندە قولداۋ تابۋى ەكى تالاي.

بريۋسسەلدە ەو ليدەرلەرى بريتانيانىڭ وداقتان شىعۋى تۋرالى رەداكتسيالانعان جاڭا كەلىسىمشارتتى ماقۇلدادى. بۇرىنعى پرەمەر تەرەزا مەي ۇسىنعان جوباعا بىرقاتار وزگەرىستەر ەنگىزىلگەن. الايدا، بريتانيالىق اقپارات قۇرالدارى «جونسون بريۋسسەلدە جەڭىسكە جەتكەنىمەن، لوندوندا جەڭىلىس تابادى» دەگەن پىكىردە.

ەرتەڭ «جاڭا برەكسيت» جوباسىن بريتانيا پارلامەنتى قاراپ داۋىس بەرەدى. ەگەر ولار جاڭا جوبانى قولداسا، وندا ءبارى دە وڭاي بولماق – ەۋروپالىق وداق كەلىسىمدى راتيفيكاتسيا جاسايدى; ەو كەڭەسى قولىن قويادى، سونىمەن قازان ايى اياقتالا سالا بريتانيا ەو-نىڭ مۇشەسى بولماي شىعا بەرمەك.

بىراق، جونسوننىڭ جەڭىسپەن ورالعان جاڭا جوباسى بۇرىنعى تەرەزا مەي جوباسى سەكىلدى لوندوننىڭ ماقۇلداۋىنان وتپەۋى مۇمكىن دەگەن پىكىرلەر كوپ. الايدا، مۇلدە قابىلدانباي قالادى دەگەنگە دە ەشكىم كەپىلدىك بەرمە المايدى.

بوريس جونسون بريۋسسەل ساپارىنان كەيىن: «مەن دەپۋتات ارىپتەستەرىمىز ەندى بىرلەسە وتىرىپ، «برەكسيتتى» سوڭىنا شىعارادى دەپ ءۇمىت ەتەمىن. ءبىز برەكسيتتى جۇزەگە اسىرىپ، ەو-مەن ىنتىماقتاسقان بولاشاقتىڭ جاڭا جوباسىن قۇراتىن ۋاقىت كەلدى»، – دەگەن.

“The Qazaq Times”