كاتولونيانىڭ دەربەستىگىن تالاپ ەتۋشىلەر ۇزاق مەرزىمگە باس بوستاندىعىنان ايىرىلدى

يسپانيانىڭ جوعارى سوتى كاتالونيانىڭ ليدەرلەرىن 9 جىلدان 13 جىلعا دەيىن باس بوستاندىعىنان ايىردى. كاتالونيانىڭ بۇرىنعى ۆيتسە-پرەزيدەنتى وريل جۋنكەراس 13 جىلعا سوتتالعان. يسپانيا جوعارى سوتى ايىپتاعان، باس بوستاندىعىنان ايىرعان 12 ساياساتكەر مەن بەلسەندىلەر وزىنە تاعىلعان ايىپپەن كەلىسپەيتىنىن ايتۋدا.

العاشىندا، ايىپتاۋشى تاراپ وريل جۋنكەراستى 25 جىلعا باس بوستاندىعىنان ايىرۋدى تالاپ ەتكەن. ول كاتالونيانىڭ دەربەستىگىن تالاپ ەتۋشىلەردىڭ ليدەرى. 25 جىل بولماسا دا، جوعارى سوت ونى ءبارى بىردەي ۇزاق مەرزىمگە سوتتادى. وعان مەملەكەت تۇتاستىعىنا قارسى توڭكەرىس ۇيىمداستىرعان جانە مەملەكەت قارجىسىن ورىنسىز پايدالاندى دەگەن ايىپتار تاققان.

كاتالونيا ۇكىمەتىنىڭ باسشىسى كيم توررا جوعارى سوتتىڭ شەشىمىن سىنعا الىپ، «ساياسيلانعان سوت» دەپ ايىپتادى. «كاتالونيا ۇكىمەتى جانە ءوز باسىم بۇل سوتتىڭ ايىپتارىن جوققا شىعارامىز. بۇل ادىلەتسىزدىك جانە دەموكراتياعا جاتپايدى»، – دەدى ول مالىمدەمەسىندە. قازىر كيم توررا يسپانيا كورولى فيليپپ IV مەن ۇكىمەت باسشىسى پەدرو سانچەسكە حات جولداپ، ولارمەن تەز ارادا كەزدەسۋگە ارەكەت ەتپەك.

توڭكەرىس ۇيىمداستىردى دەگەن ايىپپەن 9 ادام ايىپتالعان. بۇلارعا قاتىستى سوت 4 ايعا سوزىلدى. بۇعان دەيىن قۇقىق قورعاۋشىلار ولاردى مەملەكەتتىك قىزمەتتەن شەتتەتۋ ارقىلى جازالاۋدى سۇراپ كەلگەن.

جوعارى سوتتىڭ شەشىمى جاريالانا سالىسىمەن كاتالونيانىڭ دەربەستىگىن جاقتايتىن جۇزدەگەن بەلسەندى بارسەلونا كوشەلەرىندە ەرەۋىل جاساپ، «ساياسي تۇتقىنداردى بوساتسىن!» دەگەن ۇراندارىن سالدى.

ايتا كەتەيىك، ەكى جىل بۇرىن كاتالونيانىڭ يسپانيادان تاۋەلسىزدىك الۋىن سۇراعان رەفەرەندۋم وتكەن بولاتىن. يسپانيا سوتى رەفەرەندۋمدى زاڭسىز دەپ تانىعان.

“The Qazaq Times”