12 قازان سەنبى كۇنى ءۇندىستان ساپارىن اياقتاعان قىتاي باسشىسى شي جينپيڭ نەپالعا باردى. بۇل قىتاي باسشىسىنىڭ 20 جىلدان بەرى العاش رەت نەپالدا رەسمي ساپارمەن بولۋى.

Associated Press حابارىنا قاراعاندا، قىتاي باسشىسىن اۋەجايدا نەپالدىڭ ايەل پرەزيدەنتى بيدحيا دەۆي بحاندي جانە پرەمەر-مينيستر شارما ولي قارسى العان.

مالىمەتتەرگە قاراعاندا، ەكى تاراپ كەشە رەسمي كەلىسسوزدەر وتكىزگەن. كەلىسسوز كەزىندە گيمالاي تاۋى ارقىلى وتەتىن جول قۇرىلىسى جانە ۇكىمەتتەر ارا قۋعىندالعان جەكە تۇلعالاردى ۇستاپ بەرۋ تۋرالى كەلىسىمشارتتار جاساسقان. سونداي-اق، تيبەت اۆتونومياسى مەن نەپالدى تۇتاستىراتىن تەمىر جول قۇرلىسىنىڭ جوباسىنا قول قويعان.

نەپال رەسميلەرىنىڭ مالىمدەمەسىندە، ەكستراديتسيالاۋ تۋرالى كەلىسىمگە بىردەن قول قويمايتىنىن جەتكىزگەن. سوڭعى جىلدارى قىتاي نەپالمەن شەكارالاس اۋدانداردا شەكارا قاۋىپسىزدىك شارالارىن كۇشەيتكەن جانە ترانس-شەكارالىق قىلمىستىق توپتاردى جويۋعا كۇش سالۋدا.

ال، VOA اگەنتتىگىنىڭ حابارىنا قاراعاندا، قىتاي باسشىسىنىڭ ساپارى كەزىندە نارازىلىق شارالارىنىڭ الدىن الۋ ءۇشىن نەپال پوليتسياسى 22 ادامدى قاماۋعا العان.

شي جينپيڭ نەپالعا ءۇندىستان ساپارىنان كەيىن ات باسىن بۇرعان. 1996 جىلى قىتاي باسشىسى جياڭ زىمين (تسزيان تسزەمين) نەپالعا مەملەكەتتىك ساپارمەن بارعان. ودان كەيىن ەكى ەل اراسىندا جوعارى دەڭگەيدەگى الماسۋلار بولماعان.

“The Qazaq Times”