مەركەل دجونسوننىڭ ۇسىنىسىن قابىلداۋدان باس تارتتى

گەرمانيا كانتسلەرى انگەلا مەركەل ۇلىبريتانيانىڭ پرەمەر-ءمينيسترى بوريس دجونسونعا سولتۇستىك يرلانديا ەۋروپالىق وداق قۇرامىندا قالادى دەگەن شارتپەن عانا Brexit بويىنشا مامىلەنىڭ جۇزەگە اساتىنىن ەسكەرتتى. بۇل تۋرالى ۆۆس تەلەراديو حابارلارىن تاراتۋ كورپوراتسياسىنىڭ ساياسي شولۋشىسى لورا كيۋنسسبەرگ حابارلادى.

انگەلا مەركەل جانە ەممانۋەل ماكروننىڭ پىكىرىنشە، ەۋروپالىق وداق قۇرامىنان بريتانيا شىققاننان كەيىن بىرقاتار ەكونوميكالىق قيىندىقتارعا تاپ بولادى. سول سەبەپتى سولتۇستىك يرلانديامەن اراداعى شەكارا ماسەلەسىن تولىقتاي شەشىپ العان ءجون. دجونسون گەرمانيا، فرانتسيا باسشىلارىنىڭ بۇل ۇسىنىسىن ورىنداۋ «شىن مانىندە مۇمكىن ەمەس» دەپ جاۋاپ بەردى.

سولتۇستىك يرلانديانىڭ ەو-عا قاراستى بىرىڭعاي كەدەندىك ايماعىندا قالۋى دجونسون ۇسىنعان Brexit بويىنشا جاڭا جوسپارعا تولىعىمەن قايشى كەلەدى. بريتاندىق پرەمەردىڭ ۇسىنىسى «بەكستوپ» رەجيمىنە بالاما سانالادى. ياعني اتالعان جوسپار ەو مەن بۇرىنعى پرەمەر-مينيستر تەرەزا مەي ۇكىمەتى اراسىندا قول جەتكىزىلگەن كەلىسىمنىڭ بولىگى سانالادى.

بىرككەن كورولدىكتىڭ پرەمەرى بوريس دجونسوننىڭ ۇسىنىسىنا سايكەس، سولتۇستىك يرلانديا وتپەلى كەزەڭ وتكەننەن كەيىن كەدەن وداعى قۇرامىنان ءبىرجولاتا شىعادى جانە وسى اۋماقتاعى تاۋارلاردىڭ بارلىق ساناتىنا جاڭادان كەدەندىك رەجيم ەنگىزىلەتىن بولادى.

ۇلىبريتانيا ەو-دان بيىل 29 ناۋرىزدا، ياعني قاۋىمداستىقتان شىعۋ تۋرالى جازباشا حابارلاما بەرىلگەننەن كەيىن ەكى جىل وتكەن سوڭ كەتۋى كەرەك ەدى. الايدا بريتان پارلامەنتى قاۋىمدار پالاتاسىنىڭ دەپۋتاتتارى بريۋسسەل مەن بۇرىنعى پرەمەر-مينيستر تەرەزا مەي ۇكىمەتى اراسىندا قول جەتكىزىلگەن Brexit شارتتارى تۋرالى كەلىسىمنىڭ جوباسىن ءۇش رەت كەرى قايتارعان. ناتيجەسىندە ەۋروپالىق وداق Brexit-ءتى الدىمەن ءساۋىر نەمەسە مامىرعا، سودان كەيىن 31 قازانعا بەكىتۋگە كەلىستى. ساناۋلى جدىلدار ىشىندە بىرنەشە قيىندىققا تاپ بولعان مەي ۇكىمەتتى تىعىرىقتان شىعارا الماي، وتستاۆكاعا كەتۋگە ءماجبۇر بولدى.

"The Qazaq Times"