ترامپ: ءبىز تەك پايدالى جەردە جەڭىس ءۇشىن سوعىسامىز

اقش پرەزيدەنتى ءسۇريانىڭ سولتۇستىگىنەن اسكەرلەردى شىعارۋ تۋرالى شەشىمىن قورعاپ مالىمدەمە جاسادى. اقش-تىڭ بىرقاتار لاۋازىمدىلارى پرەزيدەنتتىڭ بۇل شەشىمىنە نارازى ەكەنى ءمالىم. ولار بۇنداي قادام سۇرياداعى كۇردتەر باسقاراتىن دەموكراتيالىق كۇشتەر ارمياسىن قاتەردە قالدىرادى جانە وزدەرىن «يسلام مەملەكەتى» اتاعان تەررورلىق توپقا قارسى كۇرەسكە كەرى اسەر ەتەدى دەپ قارايدى.

سۇرياداعى كۇرد قارۋلى كۇشتەرى تەررورلىق توپتارعا قارسى كۇرەستە اقش-تىڭ ماڭىزدى وداقتاسى بولعانى بەلگىلى. الايدا، پرەزيدەنت ترامپ «تۆيتتەر» پاراقشاسىندا جاساعان مالىمدەمەسىندە كۇرد قارۋلى كۇشتەرىنە اسكەري قولداۋ كورسەتۋدىڭ شىعىنى تىم قىمباتقا تۇسەتىنىن باسا ايتقان. ونىڭ ايتۋىنشا، شاعىن توپتار (تايپالار دەگەن ماعىنادا قولدانعان) اراسىنداعى «وسىنداي ءبىر ناتيجەسىز سوعىستاردىڭ اياقتالاتىن كەزى كەلگەن».

ترامپتىڭ "تۆيتتەردە" ايتقان ءسوزى. فوتو: Twitter.

«ساربازداردى ۇيىنە قايتارامىز. ءبىز تەك پايدالى جەردە جەڭىس ءۇشىن كۇرەسەمىز»، – دەپ جازدى ترامپ «تۆيتتەرگە». ول جانە: « تۇركيا، ەۋروپا، ءسۇريا، يران، يراك، رەسەي جانە كۇردتەر قازىرگى جاعدايدى بىرجاقتى ەتۋى كەرەك»، – دەگەن.

وسىدان ءبىر كۇن بۇرىن اقش ۇكىمەتى تۇركيانىڭ ءسۇريادا جاڭا اسكەري وپەراتسيالار باستاعالى وتىرعانىن حابارلاعان ەدى. بۇل مالىمدەمە تاراپ، بىرنەشە ساعات وتكەندە كۇردتەردىڭ «حاۆا» اقپارات اگەنتتىگى اقش سوعىس تەحنيكالارىنىڭ تۇركيا مەن سيريا شەكاراسى ماڭىنان شىعارىلىپ جاتقانىن حابارلادى.

ال، ءسۇريا دەموكراتيالىق ارمياسى جاساعان مالىمدەمەدە، اقش اسكەري كۇشتەرى «تۇركيانىڭ شەكاراسىنا جاقىن ايماقتان الدەقاشان شىعارىلعانىن»، سونىمەن بىرگە، اقش-تۇركيا اراسىنداعى كەلىسىمگە ساي كۇردتەردىڭ شەكارا ماڭىنداعى كەيبىر قورعانىس مۇمكىندىكتەرىن الىپ تاستاعانىن، بۇل «اقش-تىڭ كەلىسىمدى ورىنداماۋى» دەپ سىنعا الدى.

تۇركيا اسكەرى ءسۇريا تەرريتورياسىنا ىشكەرىلەي كىرە تۇسپەك. فوتو: AFR.

وقيعالاردىڭ دامۋىنا، تاراپتار جاساعان قادامدارعا قاراي وتىرىپ، مىناداي بولجام جاساۋعا بولادى: بۇعان دەيىن قۇراما شتات ورتا-شىعىستاعى كۇرد كۇشتەرىن بەلسەندى قولداپ كەلگەن. الايدا، تۇركيامەن سوڭعى سويلەسۋلەردەن كەيىن كۇرد كۇشتەرىنەن بەت بۇرا باستاعان بولۋى مۇمكىن. ارينە، تۇركيا كۇرد كۇشتەرىنەن تونگەن قاۋىپتەرگە قارسى تۇرۋ ءۇشىن قۇراما شتاتتارعا دا بەلگىلى ۇپاي ۇلەستىرگەنى انىق. ناتيجەسىندە، تۇرىك ارمياسى كىرگەن ايماقتان اقش ارمياسى شەگىنىپ شىقتى. بۇل كۇرد كۇشتەرىنىڭ قاتەردە قالعانىن كورسەتەدى. ونىڭ ۇستىنە ترامپتىڭ «پايدالى جەردە، تەك جەڭىس ءۇشىن كۇرەسەمىز» دەگەنىنەن دە ءىرى ەلدەر اراسىنداعى كەلىسىمدەردىڭ قاي باعىتتا بولعانىن شامالاپ بىلۋگە بولادى.

بىراق، ترامپ سوڭعى مالىمدەمەسىندە تۇركياعا ەسكەرتۋ جاساپ، "شەكتەن شىعىپ كەتسە ەلدىڭ ەكونوميكاسىن تالقاندايمىن" دەپ قورقىتقانداي بولدى. بۇنىسى ءالى دە كۇرد كۇشتەرىنەن تولىقتاي قول ءۇزىپ كەتپەگەنىن دە بايقاتقانداي.

“The Qazaq Times”