نارازى يراكتىق جاستار. فوتو: AFP/GETTY IMAGES.

يراكتا ءبىر اپتادان بەرى نارازىلىق شارالارى جالعاسىپ جاتىر. ۇكىمەتتىڭ شەرۋشىلەردى توقتاتۋعا جاساعان شارالارى ءونىم بەرگەن جوق. شەرۋلەر كەزىندە قازا بولعاندار سانى 100-گە جەتكەنىن، ەلدەگى ادام قۇقىعى بويىنشا پارلامەنتتىك كوميسسيا راستادى. سەنبى كۇنى كومەندانتتىق ساعات الىنا سالا نارازىلىق جۇرىستەرى قايتا باستالدى.

يراكتاعى نارازىلىق ءبىر جىل بۇرىن بيلىك باسىنا كەلگەن پرەمەر-مينيستر ءادىل ابدۋل-ماحديننىڭ بيلىگىنە قارسىلىعىن بىلدىرۋدە. جەمقورلىق، جۇمىسسىزدىق جانە ۇكىمەت قىزمەتكەرلەرىنىڭ جۇمىس ساپاسىنىڭ ناشارلىعى يراك جاستارىنىڭ كوشەگە شىعۋىنا نەگىزگى سەبەپ بولعان.

ەرەۋىلدەر ەلدىڭ وڭتۇستىگىندەگى شيىتتەر شوعىرلانعان وڭىردە كۇتپەگەن جەردەن باستالدى. قارسىلىقتىق باسىندا تۇرعان ليدەرلەرى دە جوق بولسا دا، كوپ ۇزاماي ءدۇمپۋ تۇتاس ەلگە جايىلىپ كەتتى. شەرۋگە قاتىسقاندار اراسىندا 540 الام قاماۋعا الىندى، بىراق ولاردىڭ كوبى قايتا بوساتىلىپ، 200-گە جۋىق ادام قاماۋدا تۇرعانىن جەرگىلىكتى اقپارات قۇرالدارى جازۋدا.

يراك مۇناي قورى جاعىنان الەمنىڭ 4-ءشى ورنىندا تۇرادى. الايدا، ەلدى جۇمىسسىزدىق پەن كەدەيشىلىك دەندەگەن. دۇنيەجۇزىلىك بانكتىڭ كورسەتكەن مالىمەتىنە قاراعاندا، يراكتا ءار 6-ءشى وتباسى اشارلىقپەن كۇن وتكىزىپ كەلەدى. بىلتىر ءبىر جىل ىشىندە جۇمىسسىزدىق دەڭگەيى 8 پايىزعا دەيىن وسكەن. جۇمىسقا جارامدى ازاماتتاردىڭ تەك 17 پايىزى عانا جۇمىسپەن قامتىلعان.

2014 جىلى وزدەرىن «يسلام مەملەكەتى» اتاعان تەررورلىق توپ يراكتىڭ موسۋل شاھارىندا «حاليفات» جاريالاپ، ەلدىڭ باسىم كوپ اۋماعىن باسىپ العان. باعدات بيلىگى تەرروريزمگە قارسى كۇرەستە جەڭىپ شىققانىن جاريالاسا دا، ەل ءالى اياعىنان تۇرىپ كەتە العان جوق. دۇنيەجۇزىلىك بانكتىڭ ەسەبىندە، يراكتى قايتا قۇرىپ شىعۋ ءۇشىن 88 ملرد اقش دوللارى كولەمىندە قارجى كەرەك.

“The Qazaq Times”