سولتۇستىك كورەيانىڭ سوڭعى زىمىران سىناعى اقش-تى الاڭداتۋدا

سولتۇستىك كورەيانىڭ وتكەن اپتادا سىناقتان وتكىزگەن زىمىرانى سۋ استىنان اتىلاتىن بالليستيكالىق زىمىراننىڭ جاڭا ءتۇرى ەكەنى بەلگىلى بولدى. اتالعان زىمىران سولتۇستىك كورەيانىڭ شىعىس جاعالاۋىنداعى يۋانشان قالاسىنان جاقىن ماڭداعى سۋ استىنان كوتەرىلىپ، 450 شاقىرىپ ۇشقاننان كەيىن جاپون تەڭىزىنىڭ سىرتىنا قۇلاعان.

وڭتۇستىك كورەيا قورعانىس ەكسپەرتتەرىنىڭ پىكىرىنە سەنسەك، بۇل جاڭا زىمىران پيوڭياڭ (پحەنيان) وسى جىلى سىناعان وزگە زىمىراندارعا قاراعاندا قۋاتتى، ءارى ون سۇڭگۋىر قايىقتارعا ورناتۋعا بولاتىندىقتان، اقش-تىڭ تىنىق مۇحيتىنداعى بازالارىنا كوبىرەك قاۋىپ توندىرە الادى.

وڭتۇستىك كورەيانىڭ قورعانىس وكىلدەرى جاريالاعان مالىمەتتە، سولتۇستىك كورەيا ۇشىرعان جاڭا زىمىراننىڭ ماكسيمالدى بيىكتىگى 950 شاقىرىمعا جەتەدى. قۇراما شتاتتىڭ ستراتەگيالىق جانە حالىقارالىق زەرتتەۋ ورتالىعى دا سولتۇستىك كورەيانىڭ كەزەكتى سىناعان زىمىرانىڭ قاۋپى، وسىعان دەيىن سىنالعان بارلىق زىمىراندارىنان اسىپ تۇسكەنىن راستادى. ول 2000 شاقىرىمعا جۋىق قاشىقتىققا ۇشىپ جەتە الادى.

سولتۇستىك كورەيا وسى جازدا قاتتى وتىندىق زىمىراندارىن ۇشىرىپ، دالدىگىن سىناپ كوردى. ادەتتە قاتتى وتىندىق زىمىرانداردى انىقتاۋ ونىڭ قارسىلاستارى ءۇشىن تىم قيىن. سەبەبى، قاتتى وتىندى پايدالاناتىن زىمىرانداردى ۇشىرۋدان بۇرىن جانار زاتىنىڭ مولشەرىن قالاۋىنشا وزگەرتۋگە بولادى. ال، وتكەن اپتادا سولتۇستىك كورەيا ۇشىرعان زىمىران سۇيىق وتىندى پايدالاناتىن زىمىران ەكەنى انىقتالعان.

“The Qazaq Times”