تيللەرسوننىڭ ازياداعى ساپارى – سولتۇستىك كورەيانى تەجەپ، قىتايدى اۋىزدىقتاۋ

اقش مەملەكەتتىك حاتشىسى تيللەرسون وسى اپتاداعى بەيجىڭ ساپارىندا قىتاي تارابىنا سولتۇستىك كورەيادان تونەتىن قاۋىپكە قاراتا جاڭا شارالار قابىلداتۋعا تىرىساتىنىن مالىمدەدى.

كەشە، 16 ناۋرىز بەيسەنبى، تيللەرسون مەن جاپونيا سىرتقى ىستەر ءمينيسترى فۋميو كيشيدا (Fumio Kishida) توكيودا كەزدەسكەننەن كەيىن جۋرناليستەردى قابىلداعاندا، اقش-تىڭ سولتۇستىك كورەيا ماسەلەسىندە جاپونيا جانە وڭتۇستىك كورەيامەن بولعان ىنتىماقتاستىقتى تەرەڭدەتەتىنىن ايتتى. الايدا، تيللەرسون ترامپ ۇكىمەتىنىڭ سولتۇستىك كورەيا يادرولىق باعدارلامالارى مەن زىمىراندارىنا قارسى تۇرۋدىڭ ناقتى جوسپارلارىن اشىپ ايتپادى. بۇل تۋرالى “The Wall Street Journal” باسىلىمى حابارلاپ وتىر.

تيللەرسون سوزىندە قىتايدى سولتۇستىك كورەيانىڭ ەكونوميكالىق جانە ساياسي جاقتان ەڭ نەگىزگى قولداۋشى دەپ كورسەتتى. ول تاعى بۇل ماسەلە شىعىس ازيا وڭىرلىك قايشىلىعىنداعى ەڭ ماڭىزدى ءتۇيىن دەپ اتاپ ءوتتى. الايدا الداعى ساپاردا ەكى جاققا دا ءتيىمدى بولاتىنداي جاڭا سەلبەستىكتەردى ورناتۋعا ءۇمىتتى ەكەنىن ايتتى. تيللەرسون لاۋازىمدى قىزمەتكە تاعايىندالعالى بەرى، شىعىس ازياداعى العاشقى ديپلوماتيالىق ساپارىندا ءجۇر. بۇل وعان اقش ۇكىمەتى ارتقان ۇلكەن مىندەت، سەبەبى، بۇل ساپار اقش پەن شىعىس ازيا اراسىنداعى بايلانىستىڭ دامۋى مەن قۇلدىراۋىنا تىكەلەي قاتىستى. اسىرەسە، اقش-قىتاي اراسىنداعى ترامپ بيلىگىنەن بەرگى العاشقى ديپلوماتيالىق بايلانىس. اپتا سوڭىندا تيللەرسون وڭتۇستىك كورەيا جانە قىتاي جوعارى لاۋازىمدىلارىمەن كەزدەسەدى.

تيللەرسون ساپارىنان بۇرىن، ياعني جىل باسىنان بەرى سولتۇستىك كورەيا وزدەرىنىڭ دەربەس زەرتتەپ دامىتىپ كەلە جاتقان، قۇرلىق ارالىق بالليستيكالىق زىمىراندارى سىناعىنىڭ سوڭعى كەزەڭگە وتكەنىن، ەندىگى جەردە اقش-قا وزدەرىن دالەلدەيتىنىن ايتقان بولاتىن. وسىدان كەيىن اقش دا بىردەن ىسكە كىرىسىپ، وڭتۇستىك كورەياعا «ساد» زىمىرانعا قارسى جۇيەسىن ورناتۋ ءىسىن جەدەلدەتتى. وڭتۇستىك كورەيامەن بىرلەسە وتىرىپ اسكەري وقۋ-جاتتىعۋلار تەبىنىن ارتتىردى. الايدا، سولتۇستىك كورەيا اقش پەن وڭتۇستىك كورشىسىنىڭ ارەكەتتەرىنە قارسى 6 ناۋرىزدا، اقش-قا قاراتىپ، 4 بالليستيكالىق زىمىران اتقان بولاتىن. ءبىر سوزبەن ايتقاندا تيللەرسون ساپارى، اقش-تىڭ سولتۇستىك شىعىس ازياداعى اسكەري ارەكەتتەرىمەن بىرگە جاسالعان ديپلوماتيالىق ءىس-ارەكەتى. ونىڭ تابىستى بولۋ، بولماۋى بەيجىڭ ساپارىنان كەيىن بەلگىلى بولادى.

“The Qazaq Times”