دۇنيەجۇزى قازاقتارى قاۋىمداستىعىنىڭ ۇيىمداستىرۋىمەن وزبەكستاندا بيزنەس-فورۋم ءوتتى

دۇنيەجۇزى قازاقتارىنىڭ قاۋىمداستىعى جانە «وتانداستار قورى» كەاق قازاقستان رەسپۋبليكاسىنىڭ وزبەكستانداعى ەلشىلىگىنىڭ، «اتامەكەن» ۇكپ سسپ-نىڭ جانە وزبەكستانداعى قازاق مادەني ورتالىعىنىڭ قولداۋىمەن وزبەكستان رەسپۋبليكاسىندا تۇراتىن ىسكەر قانداستارىمىز بەن بيزنەس-فورۋم وتكىزدى، دەپ حابارلايدى دۇنيەجۇزى قازاقتارى قاۋىمداستىعىنىڭ ءباسپاسوز حاتشىسى سىرىمبەك تولەۋۇلى.

دۇنيەجۇزى قازاقتارىنىڭ قاۋىمداستىعى بيزنەس-فورۋم اياسىندا شەتەلدە تۇراتىن قانداستارمەن بايلانىس ورناتۋ جانە نىعايتۋ جونىندەگى دۇنيەجۇزى قازاقتارىنىڭ قاۋىمداستىعى جانە قوردىڭ باعدارلامالارىنىڭ ءبىر بولىگى بولىپ تابىلادى. ءىس-شارانىڭ نەگىزگى ماقساتى – وزبەكستانداعى قازاق دياسپوراسى وكىلدەرىمەن ىسكەرلىك قارىم-قاتىناس ورناتۋ.

ءىس-شاراعا قاتىسۋشى ىسكەر وتانداستاردى الدىمەن دۇنيەجۇزى قازاقتارىنىڭ قاۋىمداستىعى توراعاسىنىڭ ءبىرىنشى ورىنباسارى تۇرىسبەكوۆ زاۋىتبەك قاۋىسبەكۇلى قۇتتىقتاپ، وزبەكستانداعى قانداستارمەن بيزنەس-فورۋم وتكىزۋ ماقساتى مەن ميسسياسىن ءتۇسىندىردى. سونىمەن قاتار، ەكى ەل اراسىنداعى عاسىرلار بويى قالىپتاسقان باۋىرلاستىقتى ودان ءارى نىعايتۋ ءۇشىن ىسكەرلىك بايلانىستاردى كۇشەيتۋ كەرەك ەكەندىگىن العا تارتتى. زاۋىتبەك قاۋىسبەكۇلى ءوز سوزىندە، دۇنيەجۇزى قازاقتارىنىڭ قاۋىمداستىعى مەن وتانداستار قورى قىزمەتتەرىنىڭ نەگىزگى باعىتتارىن، سونداي-اق شەتەلدەگى دياسپورامەن جۇمىس ىستەۋ جونىندەگى نەگىزگى جوبالارىن اتاپ ءوتتى.

اتالعان ءىس شاراعا قر وزبەكستانداعى وكىلەتتى ەلشىسى ساتىبالدى دارحان امانگەلدىۇلى ارنايى كەلىپ،  وتانداستار قورىنىڭ ۇيىمداستىرۋىمەن وزبەكستانداعى قانداستار اراسىندا العاش رەت وتكىزىلگەن بيزنەس-فورۋمنىڭ وتۋىمەن قاتىسۋشىلاردى قۇتتىقتادى.

وزبەكستانداعى قازاق مادەني ورتالىعىنىڭ توراعاسى ۇسەنوۆ سەرىكباي نازارۇلى وزبەكستان رەسپۋبليكاسىنداعى قازاق دياسپوراسى وكىلدەرىنىڭ ەكونوميكالىق مۇمكىندىكتەرى جايىندا ءسوز قوزعاپ، ىسكەر قانداستاردىڭ نەگىزگى كاسىپ سالالارىن جانە قازاقستانمەن ىسكەرلىك بايلانىستى نىعايتۋعا الدىمەن ساۋدا-ساتتىقتى كۇشەيتۋ قاجەت ەكەنىن العا تارتتى.

سونداي-اق، ءىس-شاراعا قازاقستاننان ارنايى كەلگەن ۇلتتىق قولونەرمەن اينالىساتىن «جۋسان» كاسىپكەرلەر بىرلەستىگىنىڭ توراعاسى توعاباي نۇرمۇراتۇلى جانە «ەل تىرەگى» قازاقستاندىق شاعىن جانە ورتا بيزنەس قاۋىمداستىعى توراعاسى اسقار ابۋباكىروۆ وزدەرىنىڭ ناقتى ىسكەرلىك جوبالارىمەن تانىستىردى.

بيزنەس-فورۋم بارىسىندا دۇنيەجۇزى قازاقتارىنىڭ قاۋىمداستىعى توراعاسىنىڭ ورىنباسارى وسپانوۆ ارعىن سەرعازىۇلى جانە وتانداستار قورى پرەزيدەنتىنىڭ كەڭەسشىسى بولات ديدار شاراعا قاتىسۋشىلارمەن ءوزارا ءىس-قيمىل تەتىكتەرىن، شاعىن جانە ورتا بيزنەس سالاسىنداعى بيزنەس-باستامالاردى ىنتالاندىرۋ، سونداي-اق ستارتاپتاردى قولداۋ جانە دامىتۋ تەتىكتەرىن ەگجەي-تەگجەيلى تالقىلادى. توقىما ونەركاسىبىنىڭ، اۋىل شارۋاشىلىعىنىڭ، قىزمەت كورسەتۋ سالاسىنىڭ دامۋىنا، تەحنولوگيالىق وندىرىستەردى قۇرۋعا نەگىزدەلگەن وزبەكستان نارىعىنىڭ بەيىنىن ەسكەرە وتىرىپ، وسى سالالارعا باسا نازار اۋدارىلدى. فورۋم قاتىسۋشىلارىنا قازاقستان وبلىستارىنىڭ ينۆەستيتسيالىق الەۋەتى تانىستىرىلدى.

فورۋم جۇمىسىنا 50-دەن استام ادام قاتىستى. قاتىسۋشىلارعا وزدەرىن قىزىقتىراتىن ستارتاپتار، بيزنەس-باستامالار، قولدا بار جوبالار تۋرالى ايتىپ، سپيكەرلەرگە سۇراقتار قويىپ، بيزنەس جوسپارلار مەن باستامالاردى قازاقستاندا، سونداي-اق حالىقارالىق نارىقتا جىلجىتۋ مۇمكىندىكتەرىن تالقىلادى.

فورۋم سوڭىندا دۇنيەجۇزى قازاقتارىنىڭ قاۋىمداستىعى توراعاسىنىڭ ءبىرىنشى ورىنباسارى زاۋىتبەك قاۋىسبەكۇلى وزبەكستاندا تۇراتىن قانداستاردى وتانداستار قورىنىڭ ۇسىنىستارعا اشىق جانە تۇراتىن جەرىنە قاراماستان بارلىق وتانداستارمەن "بايلانىستا" تۇرعانىن، ول ءۇشىن بارلىق وزەكتى ماسەلەلەر بويىنشا كەڭەس بەرەتىن جانە اقپاراتتىق قولداۋ كورسەتەتىن وتانداستار ماسەلەلەرى جونىندەگى بىرىڭعاي بايلانىس ورتالىعى ارنايى قۇرىلعانىن اتاپ ءوتتى.

وزبەكستانداعى بيزنەس-فورۋم تامىز ايىندا سان-فرانتسيسكو قالاسىندا وتكەن فورۋمنان كەيىنگى ءتورتىنشى بيزنەس-فورۋم بولىپ تابىلادى. ءتۇرلى ەلدەردە تۇراتىن وتانداستارمەن 8 ەلدە (گفر، اقش، ۇلىبريتانيا، شۆەتسيا، قىتاي حالىق رەسپۋبليكاسى، وزبەكستان، تۇركيا جانە رەسەي) بيزنس-فورۋمدار وتكىزۋ جوسپارلانعان، كەلەسى بيزنەس-فورۋم 2019 جىلى 20 قىركۇيەكتە لوندون قالاسىندا (ۇلىبريتانيا) وتەدى.

"The Qazaq Times"