«يزرايل ءسۇريا اۋماعىندا يران تاراپىنان ءتونىپ تۇرعان اسكەري قاۋىپكە باس شۇلعىپ، قاراپ وتىرا المايدى» - دەپ مالىمدەدى يزرايل پرەمەر-ءمينيسترى بينيامين نەتانياحۋ سوچيدە رەسەي پرەزيدەنتى ۆلاديمير پۋتينمەن كەزدەسۋ كەزىندە.

نەتانياحۋ تەھران يزرايلگە زىمىران جىبەرۋ ماقساتىندا ءسۇريا اۋماعىن بەلسەندى تۇردە پايدالانىپ كەلەدى، مۇنداي جاعدايدا ايماقتا اسكەري بازاسى بار رەسەي مەن ءيزرايلدىڭ ءوزارا ديالوگ ورناتۋى ماڭىزدى دەپ اتاپ ءوتتى.

ال ءوز كەزەگىندە پۋتين حالىقارالىق تەرروريزم قاۋىپى ءتونىپ تۇرعان جاعدايدا، يزرايل مەن رەسەيدىڭ ءوزارا ىقپالداسۋى ماڭىزدى دەدى. ول نەتانياحۋدىڭ يزرايلگە شاقىرتۋىن قابىل العانىن جەتكىزدى.

بيىل پۋتين مەن نەتانياحۋ ءۇش رەت كەزدەستى. وسى جولعى كەزدەسۋ يزرايلدە 17 قىركۇيەكتە بولاتىن پارلامەنت سايلاۋى قارساڭىندا ءوتىپ وتىر. يزرايل اقپارات قۇرالدارىنىڭ جازۋىنشا، نەتانياحۋ پۋتينمەن كەزدەسۋ ارقىلى ءوزى باسقاراتىن "ليكۋد" پارتياسىنىڭ بەدەلىن كوتەرۋگە تىرىسۋدا.

يزرايل پرەمەرى وسى جولعى سايلاۋدا جەڭگەن جاعدايدا يوردان وزەنىنىڭ باتىس جاعالاۋىندا يزرايل ەگەمەندىگىن ورناتىنىن مالىمدەگەن. بۇۇ باس حاتشىسىنىڭ كەڭسەسى "بۇل حالىقارالىق زاڭنىڭ بۇزىلۋى بولىپ ەسەپتەلەدى" دەپ ەسكەرتكەن. نەتانياحۋ ۇستانىمىن رەسەي دە سىناعان.

"The Qazaq Times"