پۋتين توسىننان اقش-قا دوستىق پەيىل تانىتا قالدى

رەسەي پرەزيدەنتى ۆلاديمير ءپۋتيننىڭ ءباسپاسوز حاتشىسى دميتري پەسكوۆ وتكەن اپتانىڭ سوڭىندا اقش جۋرناليستەرىن قابىلداعاندا، ترامپ ۇكىمەتىنىڭ رەسەيمەن بەتپە-بەت وتىرىپ، كەڭىنەن كەڭەسۋگە قۇلىقسىز ەكەنىن ايتتى. 12 ناۋرىز كۇنى اقش كابەلدىك جاڭالىقتار سايتىنىڭ «بۇكىلالەمدىك قوعامدىق فورۋم» بولىمىنە بەرگەن سۇحباتىندا پەسكوۆ: « رەسەي جاق اقش-رەسەي ەكى تاراپتىڭ ءجيى قارىم-قاتىناس جاساپ، بايلانىستاردى نىعايتىپ، ىنتىماقتاستىقتى جۇزەگە اسىرۋ ءۇشىن كەزدەسۋ وتىرىستارىن وتكىزۋگە ىنتالى. سەبەبى، ەكى ەل قارىم-قاتىناسىندا تالايدان جالعاسقان «ۇلى توقىراۋ» بار»، – دەدى.

دميتري پەسكوۆ سوزىندە: « اقش، رەسەي سىندى ەلدەردىڭ ەكىجاقتى ديالوگتارعا نيەت تانىتپاۋى كەشىرۋگە كەلمەيتىن قاتەلىك. اسىرەسە، قازىرگىدەي الەمدىك جانە وڭىرلىك قايشىلىقتاردىڭ اسقىنىپ تۇرعان شاعىندا»، – دەدى. بۇل تۋرالى Xinhuanet حابارلايدى.

قاڭتاردىڭ 20-شى جاڭاسىندا اقش پرەزيدەنتى بولىپ، تاققا وتىرعان ترامپ بىرنەشە رەت ءپۋتيننىڭ جەكە باسىنا قوشامەتتەر مەن العىسقا ۇقساس لەبىزدەر ايتىپ، ءوزىنىڭ اقش-رەسەي قارىم-قاتىناسىن جاقسارتۋعا نيەتتى ەكەنىن بىلدىرگەن. اق ۇيدەگى، كرەملدەگى، وزگە ەلدەردەگى ساياساتكەرلەردە ترامپتىڭ پرەزيدەنتتىككە كەلۋى اقش پەن رەسەي اراسىنداعى قاتىناستىڭ جاقسارۋىنان دەرەك بەرەدى دەگەن كوزقاراستا بولدى. الايدا ەكى جاقتى رەسمي كەزدەسۋ وتىرىستارى، ىنتىماقتاستىق كەلىسسوزدەر بولمادى. تالايدان ۋاشينگتوننىڭ ساياسي قادامدارىن اڭدىپ جاتىپ العان ماسكەۋ، ەندى اقش-رەسەي قاتىناسىن جاقسارتۋعا نيەتتى ەكەندىكتەرىن ايتىپ وتىر.

كرەمل ترامپتىڭ اقش-رەسەي قارىم-قاتىناسىن جاقسارتۋ نيەتىنە پرەزيدەنت پۋتين الدە قاشان كەلىسىم بەرگەن دەپ وتىر. سونىمەن بىرگە وزدەرىنىڭ اقش-پەن سيرياداعى «يسلام مەملەكەتى» قاتارلى ەكسترەميستىك توپتارمەن كۇرەسۋدە پراكتيكالىق كەڭەيتىلگەن ىنتىماقتاستىققا قول جەتكىزگەنىن ايتتى. بۇل الداعى ۋاقىتتاعى ەكى ەل قاتىناسىن جاقسارتۋ ءۇشىن كولدەنەڭ تارتقان كەپىلى بولسا كەرەك. الايدا پەسكوۆتىڭ ويىنشا ەكى الپاۋىتتىڭ ارا قاتىناسىن جاقسارتۋدا، اقش كوبىرەك ۇمتىلىس جاساۋ كەرەك ەكەن.  اقش ورتالىق بارلاۋ اگەنتتىكتەرىنىڭ رەسەي تۋرالى شەشىمدەرى دە ەكى ەل اراسىنا ىرىتكى سالىپ وتىر دەگەن ويىن دا جاسىرمادى پەسكوۆ.

ترامپتىڭ تاققا كەلۋىمەن اقش-رەسەي قارىم-قاتىناسى جاقسارادى دەپ كۇتكەندەردىڭ ءۇمىتى بارعان سايىن سولعىن تارتتى. سەبەبى، سوڭعى كەزدەگى وڭىرلىك جانە الەمدىك قايشىلىقتاردا ەكى ەلدىڭ مۇددەلەرى تەكە-تىرەسكە تاعى ءتۇستى. ناتو مەن رەسەي ارمياسىنىڭ ءبىر-بىرىنە ءدوڭ ايبات تانىتۋى، ۋكراين، شىعىس ازيا، كورەي تۇبەگى سىندى وڭىرلىك قايشىلىقتار ەكى ەلدىڭ ىنتىماقتاستىققا ۇمتىلىستارىن جوققا شىعارعالى وتىر. «كەلسەڭ كەل!» دەيتىن كرەملدىڭ توسىن بوساي قالىپ، اقش-قا جىلى قاباق تانىتۋى الداعى ۋاقىتتاعى ۇلكەن وزگەرىستەردىڭ بارلىعىن بىلدىرسە كەرەك. اقش رەسەيگە قاراتقان سانكتسياسىن الماسا، رەسەيدىڭ كۇنى بارعان سايىن قيىندايتىنى تاعى بار.

“The Qazaq Times”