بەلگىلى كاسىپكەر-ينۆەستور، بيزنەس اعارتۋشى، ازاماتتىق قوعامنىڭ بەلدى وكىلى مارعۇلان سەيسەمباەۆ. فوتو: twitter جەلىسىنەن

بۇگىن تانىمال كاسىپكەر، ينۆەستور، قوعام بەلسەندىسى مارعۇلان سەيسەمباەۆ ءوزىنىڭ ينستاگرام پاراقشاسىندا قۇقىق قورعاۋ ورگاندارى تاراپىنان ەسكەرتۋلەر ("قوقان-لوقى") الىپ جاتقانىن، وزىنە قارسى جاساندى ايىپتار تاعىلۋى مۇمكىن ەكەندىگىن مالىمدەدى.

الەۋمەتتىك جەلىدە بەلسەندى، ازاماتتىق قوعامنىڭ بەلدى وكىلى مارعۇلان قاليۇلى جەكە بلوگ جۇرگىزىپ، جاستاردى كاسىپكەرلىككە باۋلۋ، تۇلعالىق دامۋ، ينۆەستورلىق كەيستەر مەن سالاۋاتتى ءومىر ءسۇرۋ تاجىريبەلەرىمەن ءبولىسىپ، بيزنەس اعارتۋشىلىقپەن اينالىسىپ جۇرگەنىنە ءبىرشاما جىل بولدى.

ول ارقانداي ماڭىزدى قوعامدىق وقيعالارعا، ساياسي جاڭالىقتارعا قاتىستى وتكىر پىكىرلەرى مەن جەكە كوزقاراسىن ءبىلدىرىپ وتىرادى. قازاقستاندىق جاستاردىڭ بەيرەسمي مەنتورىنا اينالعان كاسىپكەر-ينۆەستور ءوز وقىرماندارىن «اقپاراتتىق كەڭىستىكتەگى مەنىڭ ءۇنىمدى ءوشىرۋ ءۇشىن ارنايى اقپاراتتىق شابۋىل جاسالماقشى» دەگەن قاۋپىمەن قۇلاقتاندىردى. ونىڭ ايتۋىنشا، «ساتىمپاز بلوگەرلەر» مەن «ءانونيمدى ينتەرنەت كوزدەرى» ءار كەزدەرى بەرگەن سۇقبات-پىكىرلەرىن قيىپ-مونتاجداپ، وزىنە قارسى باعىتتالعان «ايىپتاۋشى ايعاقتاردى» بەلسەندى تۇردە ازىرلەۋگە كىرىسكەن.

تاۋەلسىز كوزقاراستاعى كاسىپكەر جازبا سوڭىندا اۋديتورياسىنان وزىنە «جيىركەنىشتى ادىسپەن كۇرەسۋدە» كومەكتەسۋىن، قولداۋىن سۇراعان. 112 مىڭنان استام وقىرمانى بار بىلىكتى-ينتەللەكتۋال بيزنەسمەننىڭ «نازار اۋدارىڭىزدار! ساق بولىڭىزدار» تاقىرىبىنداعى اتالمىش جازباسىنا ەكى ساعات ىشىندە 5 مىڭنان استام لايك باسىلىپ، سونىمەن قاتار 400-گە تارتا وقىرمان-اككاۋنت قولداۋ مانىندەگى پىكىر بىلدىرگەن.

ەستەرىڭىزگە سالا كەتسەك، م.سەيسەمباەۆ بىلتىر اقپان ايىندا ەكىنشى رەت ەلگە «بيلىكتىڭ سەنىمدى كەپىلدىگى» ارقىلى ورالعان ەدى. «اليانس-بانكتىڭ» بۇرىنعى مەنشىك يەسى مارعۇلان سەيسەمباەۆتى تەرگەۋ ورگاندارى بتا بانكىنە قاتىستى ە.ەرىمبەتوۆتىڭ ءىسى بويىنشا جاۋاپ الۋعا شاقىرعاننان كەيىن ەلدەن كەتىپ، قايتا كەلگەن.

قۇزىرلى ورگانداردان قىسىم كورىپ جاتقان مارعۇلان سەيسەمباەۆتىڭ جەكە پاراقشاسىنان قيىپ الىنعان سكرينشوت. 3 قىركۇيەك 2019 جىل. فوتو: @margulan_seissembai / instagram

قۇزىرلى ورگانداردان قىسىم كورىپ جاتقان مارعۇلان سەيسەمباەۆتىڭ جەكە پاراقشاسىنان قيىپ الىنعان سكرينشوت (جالعاسى). 3 قىركۇيەك 2019 جىل. فوتو: @margulan_seissembai / instagram

"The Qazaq Times"