وزبەكستاندا پرەزيدەنت شاۆكات ميرزيەەۆتىڭ تاپسىرماسىمەن «وزبەكعارىش» عارىشتىق زەرتتەۋلەر مەن تەحنولوگيالار اگەنتتىگى قۇرىلادى. بۇل تۋرالى ءوزا باسىلىمى حابارلادى.

ميرزيەەۆتىڭ قاۋلىسىندا: «ەلدە عارىشتىق زەرتتەۋلەر جانە تەحنولوگيالار سالاسىندا جەردى قاشىقتان زوندتاۋ، سپۋتنيكتىك بايلانىس، ناۆيگاتسيالىق جۇيە سىندى قىزمەتتەر مۇلدەم دەرلىك جۇزەگە اسىرىلمايدى. ولار اۋىل جانە سۋ شارۋاشىلىعى، ەكولوگيا، تەلەكوممۋنيكاتسيا، گەولوگيالىق بارلاۋ، كارتوگرافيا، مەتەورولوگيا، سەيسمولوگيا جانە قالا قۇرىلىسى سياقتى سالالاردا تيىمدىلىكتى ارتتىرۋعا مۇمكىندىك بەرەدى. ەلدىڭ ودان ارعى تۇراقتى دامۋى ءۇشىن قولدا بار عىلىمي-تەحنيكالىق الەۋەتتى ءتيىمدى ىسكە اسىرۋ ماقساتىندا، سونىڭ ىشىندە ەكونوميكانىڭ ءتۇرلى سالالارىندا يننوۆاتسيالىق عارىش تەحنولوگيالارىن پايدالانۋ جولىمەن، سونداي-اق وزبەكستان رەسپۋبليكاسىنىڭ قاۋىپسىزدىگىن قامتاماسىز ەتۋ ماقساتىندا وزبەكستان رەسپۋبليكاسىنىڭ مينيسترلەر كابينەتىنىڭ جانىنان عارىشتىق زەرتتەۋلەر جانە تەحنولوگيالار اگەنتتىگىن («وزبەكعارىش») قۇرۋدى تاپسىرامىن»، – دەلىنگەن.

سونىمەن قاتار، قۇجاتتا «وزبەكعارىش» اگەنتتىگىنىڭ باستى مىندەتى عارىشتىق زەرتتەۋلەر جاساۋ ارقىلى، وزبەكستانداعى عارىش سالاسىنىڭ ينفراقۇرىلىمىن ازىرلەپ، مەملەكەتتىك ساياسات پەن ستراتەگيالىق باعىتتاردى جۇزەگە اسىرۋ ەكەندىگى ايتىلعان.

"The Qazaq Times"