تايۋان پرەزيدەنتى ساي يىڭۆىن حانىم گونكونگ ماسەلەسى تۋرالى پىكىر ءبىلدىردى. فوتو: TBTV

ءبىر كۇن بۇرىن تايۋان (تايۆان) پرەزيدەنتى ساي يىنۆىن حانىم گونكونگ داعدارىسى تۋرالى پىكىر ءبىلدىردى. ول سوزىندە بەيجىڭ بيلىگىن گونكونگتاعى الەۋمەتتىك تولقۋلار ءۇشىن سىرتقى كۇشتەردى كىنالاۋدىڭ ورنىنا، گونكونگ بيلىگىمەن ىنتىماقتاسا وتىرىپ ماسەلەنى شەشۋگە شاقىردى. ول اتالعان مالىمدەمەسىن اۋستراليانىڭ (اۆستراليا) بۇرىنعى قورعانىس ءمينيسترى كريستوفەر پينمەن كەزدەسۋ كەزىندە ورتاعا سالعان. 

ساي حانىم سوزىندە اتالعان ماسەلە تايۋان ۇكىمەتى مەن حالقىن دا قاتتى الاڭداتاتىنىن، الايدا داعدارىسقا بايلانىستى بەيتاراپتىقتى ساقتايتىنىن جەتكىزگەن. ول مالىمدەمەسىندە تايۋان دەموكراتيالىق لاگەردىڭ وكىلى رەتىندە گونكونگ تۇرعىندارىنىڭ دەموكراتيا مەن تاۋەلسىزدىك تالاپتارىن تولىقتاي قولدايتىنىن، الايدا، گونكونگتاعى جاعدايدىڭ قيىنداپ كەتۋىنەن الاڭدايتىنىن ايتتى.

گونكونگتاعى نارازىلىق ەرەۋىلدەرى ءۇشىنشى ايعا ۇلاسقان تۇستا ەرەۋىلشىلەردىڭ تالاپ تىلەكتەرىنىڭ دە سالماعى كۇشەيە باستادى. قازىر شەرۋشىلەر دەموكراتيا مەن تاۋەلسىزدىك تالاپتارىن العا تارتۋدا. بۇعان بەيجىڭ قاتتى اشۋلى جانە تولقۋلاردىڭ ارتىندا شەتەلدىك كۇشتەر بار ەكەنىن ايتۋدا. ال، وسى تۇستا تايۋان ۇكىمەتىنىڭ گونكونگ ماسەلەسى تۋرالى پىكىر ءبىلدىرۋى جانە گونكونگ تۇرعىندارىنىڭ دەموكراتيا مەن تاۋەلسىزدىك تالابىن قولداۋى بەيجىڭ ءۇشىن وڭاي قىسىم بولمايدى.

تايۋان پرەزيدەنتى گونكونگ ماسەلەسى بويىنشا بۇدان بۇرىن دا ءوز پىكىرىن بىلدىرگەن ەكەن. الايدا، قىتاي لاۋازىمدىلارى ونىڭ گونكونگتىك ەرەۋىلشىلەردىڭ تالاپ تىلەگىن قولداۋ نەگىزىندەگى پىكىرلەرىن قاتاڭ سىنعا الىپ كەلدى. ولار تايۋان پرەزيدەنتىنىڭ بۇل پىكىرلەرى گونكونگ ماسەلەسىنە ارالاسۋ دەپ باعالاعان. سونىمەن بىرگە، بەيجىڭ تارابى تايۋانعا قايتا-قايتا ەسكەرتۋ جاساپ، گونكونگ ماسەلەسىنە ارالاسپاۋدى، ايىپتالعان جەكە تۇلعالاردى شەتكە شىعارۋعا كومەك بەرمەۋدى ەسكەرتىپ كەلەدى.

“The Qazaq Times”