كەشە ەل استاناسىندا ەكس-پرەزيدەنت ن.ءا.نازارباەۆ قر ۇكىمەت باسشىسى اسقار ءماميندى قابىلدادى. 19 تامىز كۇنگى قابىلداۋ تۋرالى تاۋەلسىز قازاقستاننىڭ ءبىرىنشى پرەزيدەنتىنىڭ كەڭسە سايتى حابارلادى. كەزدەسۋ بارىسىندا بيىلعى 7 ايدىڭ قورىتىندىسى بويىنشا قازاقستاننىڭ الەۋمەتتىك-ەكونوميكالىق دامۋ ناتيجەلەرى تالقىلانعان. نازارباەۆ ارىس قالاسىنىڭ الەۋمەتتىك ماڭىزدى نىساندارى مەن تۇرعىن ۇيلەرىن قالپىنا كەلتىرۋ پروتسەسىنە، سونداي-اق تۇركىستاندى دامىتۋ شارالارى، ۇكىمەت پەن Nur Otan پارتياسىنىڭ بىرلەسە جۇمىس ىستەۋىنىڭ ماڭىزدىلىعىن ءسوز ەتكەن. سونداي-اق، رەسمي حابارلامالارعا قاراعاندا، كەزدەسۋدە ۇلتتىق ەكونوميكاعا شەتەل كاپيتالىن تارتۋ جانە وڭىرلەردەگى ينۆەستيتسيالىق احۋالدى جاقسارتۋ ماسەلەلەرى قارالعان.
19 تامىز كۇنگى بۇرىنعى پرەزيدەنت ن.نازارباەۆتىڭ قابىلداۋىندا وتىرعان ۇكىمەت باسشىسى ا.مامين. 19 تامىز 2019 جىل. ەل استاناسى. فوتو: elbasy.kz
ءبىر قىزىعى، وسىدان ەكى جۇما بۇرىن قازاقستاننىڭ قازىرگى پرەزيدەنتى قاسىم-جومارت توقاەۆ تا پرەمەر-مينيستر اسقار ءماميندى قابىلداپ، اتالمىش جايتتارمەن ماندەس بىرقاتار ماسەلەلەر تۋرالى تاپسىرمالار جۇكتەگەن بولاتىن. اتاپ ايتقاندا، ۇكىمەت پرەمەرى ارىستى قايتا قالپىنا كەلتىرۋ جانە تۇركىستانداعى ينفراقۇرىلىم جونىندە بايانداپ، ەلىمىزگە تارتىلعان ينۆەستيتسيالار كورسەتكىشى، ەۋرازيالىق ەكونوميكالىق وداق اياسىندا ىقپالداستىقتى دامىتۋ، 2020 جىلى كوكشەتاۋ قالاسىندا وتەتىن قازاقستان مەن رەسەي وڭىرارالىق ىنتىماقتاستىعى فورۋمىنا دايىندىق تۋرالى ايتىلعان ەدى. 6 تامىز بەن 19 تامىز ۇكىمەت باسشىسى ەكس-پرەزيدەنت پەن پرەزيدەنت اراسىندا قايتا-قايتا بايانداما جاساپ جۇرگەن ا.ءماميننىڭ كەزدەسۋلەرى تاقىرىبى الەۋمەتتىك جەلىلەردە ءبىرشاما «قايناعان شاينەكتى» ەسكە سالاتىن پولەميكا پلاتفورماسىنا اينالىپ ۇلگەردى.
6 تامىز كۇنى ەل پرەزيدەنتى قاسىم-جومارت توقاەۆ پرەمەر-مينيستر اسقار ءماميندى قابىلداۋ ءساتى. 6 تامىز 2019 جىل. ەل استاناسى. فوتو: akorda.kz
نۇرسۇلتان نازارباەۆ 19 ناۋرىزدا قازاقستان حالقىنا ءوز وكىلەتتىگىن توقتاتاتىنى تۋرالى مالىمدەگەن ەدى. «وزدەرىڭىز بىلەسىزدەر، زاڭدارىمىزعا سايكەس مەن تۇڭعىش پرەزيدەنت – ەلباسى (ۇلت كوشباسشىسى) مارتەبەسىنە يە بولدىم. ەلەۋلى وكىلەتتىگى بار قاۋىپسىزدىك كەڭەسىنىڭ توراعاسى رەتىندە قىزمەت ەتە بەرەمىن. «نۇر وتان» پارتياسىنىڭ توراعاسى، كونستيتۋتسيالىق كەڭەستىڭ مۇشەسىمىن. ياعني وزدەرىڭىزبەن بىرگە بولامىن. ەلىمىزدىڭ، حالقىمىزدىڭ قامى – مەنىڭ مۇددەم بولىپ قالا بەرەدى»، – دەگەن ەدى ول ءوز ۇندەۋىندە.
بۇعان دەيىن قابىلدانعان زاڭدارعا سايكەس، قاۋىپسىزدىك كەڭەسىن ءومىر بويى باسقارۋ قۇقىعىنا يە نازارباەۆ بيىل 16 مامىردا وتكەن XII استانالىق ەكونوميكا فورۋمىندا:
– مەن قازاقستاندا ەكىۇدايىلىق بولمايدى دەپ ويلايمىن. ءبىر عانا پرەزيدەنت بار، ءبىر عانا پرەزيدەنت بار جانە ول – ەڭ باستىسى. ونى سايلاعاننان كەيىن ءبارىمىز سوعان جۇمىس ىستەيتىن بولامىز, – دەگەن ەدى مودەراتور، Euronews ءجۋرناليسى شتەفان گروبەنىڭ سۇراعىنا جاۋاپ بەرە وتىرىپ. كوپ وتپەي بەلگىلەنگەن كۇنى 9 ماۋسىم جالپىحالىقتىق سايلاۋ ارقىلى قاسىم-جومارت توقاەۆ ەل پرەزيدەنتتىگىنە سايلانعان ەدى. بىراق...
ەكى اپتا ىشىندە ەكس-پرەزيدەنت پەن قازىرگى پرەزيدەنت قابىلداۋلارىندا بولىپ شىققان ۇكىمەت باسشىسى اسقار مامين. كوللاج. فوتو: elbasy.kz جانە akorda.kz
كيبەرشابۋىلعا ۇشىراعان باق وكىلدەرى قۇقىق قورعاۋ ورگاندارىنا ارىز ءتۇسىردى
Oyan, Qazaqstan قوزعالىسىنىڭ تاعى ءبىر بەلسەندىسىن پوليتسيا بولىمىنە شاقىردى
ورتالىق ازيا: تاريحي، ساياسي جانە ەكونوميكالىق مۇددەلەر اياسىندا
قىرعىزستاندا تاۋەلسىز Kloop باسىلىمىنىڭ قىرعىز تىلىندەگى سايتى بۇعاتتالدى
ەكس-مينيستر ايەلىن ساباپ ءولتىردى دەگەن كۇدىكپەن ۇستالدى