رەسەيلىك زاڭگەر ەل پرەزيدەنتى ۆلاديمير ءپۋتيننىڭ ۇستىنەن ارىز جازدى.

ۆلاديۆوستوك قالاسىنىڭ تۇرعىنى ماكسيم چيحۋنوۆ سەۆاستوپول قالاسىنىڭ جول پوليتسياسىنا ۆلاديمير ءپۋتيندى اكىمشىلىك جاۋاپكەرشىلىككە تارتۋدى سۇراپ، ارىز جازدى. ول ءپۋتيننىڭ موتوتسيكلدى ارنايى باس كيىمسىز ايداعانى كۇشىن جازالاۋدى تالاپ ەتۋدە. چيحۋنوۆتىڭ سوزىنشە، ول پرەزيدەنتتىڭ موتوتسيكلمەن بىرنەشە ادامنان قۇرالعان كولىك كالونناسىن باستاپ كەلە جاتقانى بەينەلەنگەن فوتوسۋرەتتى عالامتوردان كورگەن.

تامىز ايىنىڭ 10-ى كۇنى ۆلاديمير پۋتين كرەمل ساياساتىن قولدايتىن «تۇنگى قاسقىرلار» بايك-شوۋىنىڭ قوناعى بولىپ، اننەكسيالانعان سەۆاستوپول قالاسىن «ورال» موتوتسيكلمەن ارالاعان. ونىمەن بىرگە سەۆاستوپول مەرىنىڭ مىندەتىن اتقارۋشى ميحايل رازۆوجاەۆ پەن قىرىم باسشىسى سەرگەي اكسەنوۆ بولعان.

ۋكراينا سىرتقى ىستەر مينيسترلىگى ءپۋتيننىڭ سەۆاستوپولعا ساپارىن «ۋكراينانىڭ تۇتاستىعى مەن تاۋەلسىزدىگىنە قول سۇعۋ» دەپ باعالاپ، قاتاڭ سىنعا الدى.

بۇعان دەيىن ارحانگەلسك وبلىستىق سوتى گەورگي مينياەۆقا «ۆلاديمير ءپۋتيندى قاۋىپسىزدىك بەلدىگىن تاقپاي كاماز ايداعانىن سىناعانى» ءۇشىن 15 مىڭ رۋبل ايىپپۇل سالعان. سوت مينياەۆ پىكىرىن «بيلىككە ءتىل تيگىزۋ» دەپ باعالاعان. ول كەزدە پۋتين كاماز-بەن قىرىم كوپىرىنىڭ ۇستىنەن ءجۇرىپ وتكەن.

"The Qazaq Times"