يتاليا كواليتسياسى داعدارىس ۇستىندە تۇر

يتالياداعى باسقارۋشى كواليتسيا داعدارىس ۇستىندە تۇر. بۇل جاعداي ەلدىڭ ەكونوميكالىق جاعدايىنا كەرى اسەرىن تيگىزۋدە.

كواليتسياداعى داعدارىسقا «ليگا» مەن «بەس جۇلدىز قوزعالىسى» پارتيالارى اراسىنداعى داۋ سەبەپ بولعان. وڭپوپۋليستىك «ليگا» پارتياسىنىڭ ليدەرى ماتتەو سالۆيني يتاليا ۇكىمەتىندەگى جىككە ءبولىنۋ تۋرالى ايتىپ، كەزەكتەن تىس پارلامەنتتىك سايلاۋ وتكىزۋ قاجەتتىگىن مالىمدەدى.

2011 جىلى يتاليادا ەكونوميكالىق داعدارىس ورىن الىپ، زەينەتكەرلىك جاسى 67-گە دەيىن ۇلعايتىلعان بولاتىن. سوڭعى جىلدارداعى يتالياداعى ساياسي داعدارىستىڭ ەڭ باستى سەبەبى، پارلامەنتتەگى باسىم ورىندى ەشبىر پارتيا نەمەسە اليانستىڭ جەڭىپ الماۋى دەپ سانايدى ساراپشىلار. بۇل يتاليا پارلامەنتىن قاۋقارسىزدىققا الىپ كەلىپ، سوڭىندا ۇزاق جىلعا سوزىلعان ساياسي داعدارىستار مەن ەكونوميكالىق قيىنشىلىقتارعا ۇشىراتتى. سالدارىنان ەۋروايماقتىڭ ءۇشىنشى ۇلكەن ەكونوميكالىق ايماعى اۋقىمدى ساياسي تۇراقسىزدىققا تاپ بولدى.

بىلتىر وسى ماسەلەگە قاتىستى جيىن ءوتىپ، ەۋروكوميسسيا يتاليادان العاش رەت بيۋدجەت جوباسىن تولىقتىرۋدى تالاپ ەتتى. ريم الەۋمەتتىك باعدارلامالارعا قاتىستى بيۋدجەت كولەمىن 0,9%-عا ۇلعايتۋدى ۇسىنعانمەن، بريۋسسەل ونى كەرى قايتاردى. سەبەبى، ەكى تاراپ ۇسىنىسىنداعى ايىرماشىلىق 25 ميلليارد ەۋروعا جەتكەن. قازىردىڭ وزىندە يتاليا جۇمىسسىزدىق يندەكسى بويىنشا ەو ەلدەرى اراسىندا ءۇشىنشى ورىندا.

"The Qazaq Times"