فوتو: https://torange.biz

رەسەي اننەكسيالاعان قىرىم اۋماعىندا ۋكراينا تۋى كوتەرىلدى، – دەپ حابارلايدى «ۋكراينفورم».

مالىمەتتەر بويىنشا، سۋداك قالاسىنداعى بەلسەندىلەر 6 تامىزدا دونباسستا قازا تاپقان ساربازدار قۇرمەتىنە ارنايى جيىن وتكىزىپ، ەل تۋىن كوتەرگەن.

وسىعان دەيىن ۋكراينالىق «بىرلەسكەن كۇشتەر وپەراتسياسى» دونباسستا قاقتىعىس سالدارىنان ءتورت ساربازدىڭ قازا بولعانىن جاريالاعان ەدى. بۇل جاعدايدان كەيىن ۋكراينا پرەزيدەنتى ۆلاديمير زەلەنسكي رەسەي باسشىسى ۆلاديمير پۋتينگە قوڭىراۋ شالىپ، «ارانداتۋشىلىق ارەكەتتەر مەن جازىقسىز جانداردىڭ قۇربان بولۋىنا جول بەرمەۋ كەرەكتىگىن» ەسكەرتكەن بولاتىن. سونىمەن قاتار، تاراپتار دونباسستا بۇرىندارى ورىن العان قاقتىعىستار جونىندە سويلەسكەن. كەيىننەن زەلەنسكي اتالعان وقيعانى فرانتسيا پرەزيدەنتى ەممانۋەل ماكرونمەن دە تالقىلادى.

رەسەي 2014 جىلى ناۋرىزدا قىرىمدى اننەكسيالاعان. ماسكەۋدىڭ بۇل ارەكەتىنە ۋكراينا، اقش جانە ەۋروپالىق وداق قۇرامىنداعى مەملەكەتتەر قارسىلىق ءبىلدىرىپ، رەسەيدى «اگرەسسيالىق ساياسات ۇستاناتىن مەملەكەت» دەپ اتاعان. ءالى كۇنگە دەيىن اقش، ەو، تۇركيا، ۋكراينا قىرىمدى رەسەي جەرى رەتىندە مويىندامايدى.

"The Qazaq Times"