يران "اۋە - اۋە" ساناتىنداعى زىمىراندارىنىڭ ءۇش جاڭا ءتۇرىن تانىستىردى. بۇل تۋرالى Irna اگەنتتىگى حابارلادى.

قورعانىس ءمينيسترى امير ءحاتاميدىڭ سوزىنشە، زىمىرانداردى جويعىش ۇشاقتارعا، تىكۇشاقتارعا جانە ۇشقىشسىز ۇشاقتارعا ورنالاستىرۋعا بولادى. زىمىرانداردىڭ ءبىرى 50 شاقىرىمنان استام قاشىقتىقتاعى نىسانداردى اتىپ تۇسىرۋگە قاۋقارلى.

جاڭا قارۋ ءتۇرى تەھران مەن ۋاشينگتون قارىم-قاتىناسى سالقىن تارتقان ۋاقىتتا تانىستىرىلىپ وتىر. بىلتىرعى جىلدىڭ مامىر ايىندا اقش يراننىڭ يادرولىق باعدارلاماسىنا قاتىستى كەلىسىمنەن شىعىپ كەتكەن. بۇعان قوسا ۋاشينگتون تەھرانعا قاتىستى بىرقاتار سانكتسيالارىن قايتا ىسكە قوسقان.

بيىل ماۋسىم ايىندا يران بيلىگى يادرولىق كەلىسىمدەگى مىندەتتەردى ورىنداۋدان باس تارتاتىنىن مالىمدەدى.

تەھراننىڭ يادرولىق باعدارلاماسىن جويۋدى كوزدەيتىن كەلىسىم 2015 جىلى قابىلدانعان. وعان يران، اقش، فرانتسيا، ۇلىبريتانيا، رەسەي، قىتاي جانە گەرمانيا ەلدەرى قول قويعان.

"The Qazaq Times"