ىستامبۇلدا ءال-فارابي ءۇيى اشىلدى

ىستامبۋلدا ءال-فارابي ءۇيى اشىلدى. اتالعان جوبانى قازاز ۇلتتىق ۋنيۆەرسيتەتى ىستامبۇل قالالىق اكىمدىگىمەن بىرلەسە وتىرىپ، تۇركى كەڭەسى، تۇركسوي جانە تۇركياداعى قازاقستان رەسپۋبليكاسى ەلشىلىگىنىڭ قولداۋىمەن جۇزەگە اسىردى، دەپ جازادى ۇازۇۋ ءباسپاسوز قىزمەتى.

ءىس-شارانىڭ سالتاناتتى اشىلۋىنا ىتامبۇل قالاسى اكىمىنىڭ ورىنباسارى شەنگۇل ارسلان، تۇركسوي باس حاتشىسى دۇيسەن قاسەيىنوۆ، قازۇۋ رەكتورى عالىم مۇتانوۆ، ستامبۋل ۋنيۆەرسيتەتىنىڭ رەكتورى ماحمۇد اك، تۇركيانىڭ قر ەلشىلىگىنىڭ جانە ىستامبۇل قالاسىنداعى قر باس كونسۋلدىعىنىڭ وكىلدەرى، ەۋروپاداعى قازاق دياسپوراسى، باق جانە قوعام وكىلدەرى قاتىستى.

ءال-ءفارابيدىڭ ەتنوگرافيالىق مۇراجاي-ءۇيىنىڭ اشىلۋى 2020 جىلى يۋنەسكو قولداۋىمەن كەڭ كولەمدە حالىقارالىق دەڭگەيدە اتالىپ وتىلەتىن ءال-ءفارابيدىڭ 1150 جىلدىعىنا ارنالىپ وتىر. ءال-فارابي مۋزەي-ءۇيى - الەمنىڭ تۋريستىك ورتالىقتارىنىڭ ءبىرى - ىستامبۇل شاھارىنىڭ ءدال ورتاسىنداعى تۇركى الەمى ەتنوگرافيالىق مۇراجاي-كەشەنىندە ورنالاسقان.

مۋزەي-ءۇي بىرنەشە بولىمنەن تۇرادى، مۇندا اريستوتەلدەن كەيىن ادامزاتتىڭ ەكىنشى ۇستازى اتانعان ۇلى تۇركى ويشىلى ءابۋ ناسىر ءال-ءفارابيدىڭ ومىرىنەن الىنعان دەرەكتەر مەن قۇندى تاريحي مالىمەتتەر بەرىلگەن. سونىمەن قاتار، مۇسىندىك كومپوزيتسيالار، تاريحي جادىگەرلەر، عالىمنىڭ ەڭبەكتەرى جانە ادامزات ءىلىمىنىڭ بىرنەشە سالاسىنا وراسان زور ۇلەس قوسقان ويشىل تۋرالى ماتەريالدار كورىنىس تاپقان.

قازىرگى ۋاقىتتا وركەنيەتتەر قاقتىعىسى شيەلەنىسىپ، الەمدە دەسترۋكتيۆتى باعىتتاعى ۇيىمدار ارەكەتتەرى ادامزات وركەنيەتىنىڭ دامۋىنا كەرى اسەرىن تيگىزۋدە. تەحنولوگيانىڭ قارقىنداپ دامىپ، مادەني-رۋحاني قۇندىلىقتاردىڭ السىرەپ، جۇتاڭدانۋ قاۋپى بار جاھاندانۋ زامانىندا ۇلى ويشىلدىڭ دۇنيەتانىمى، ونىڭ وركەنيەت جونىندەگى تۇجىرىمدارى، الەۋمەتتىك-ەتيكالىق، ساياسي، فيلوسوفيالىق، كوزقاراستارى قوعامىمىز ءۇشىن وتە وزەكتى بولىپ وتىر.

"تۇركيادا ءال-فارابي ءۇيىنىڭ اشىلۋى، ادامزات وركەنيەتىندە باعا جەتپەس ءرول اتقارعان ۇلى دالانىڭ ۇلى تۇلعاسىنىڭ شىعارماشىلىق مۇراسى ارقىلى تۇركى مەن قازاق مادەنيەتى جاۋھارلارىن الەمگە پاش ەتۋگە ارنالعان ءىرى تاريحي جاسامپاز جوبا رەتىندە بولاشاققا قىزمەت اتقاراتىن بولادى", - دەدى سالتاناتتى شارادا قازۇۋ رەكتورى عالىم مۇتانوۆ.

بۇل جوبانى قازۇۋ رەكتورى عالىم مۇتانوۆ بىرىككەن ۇلتتار ۇيىمىنىڭ (بۇۇ) نيۋ-يوركتەگى شتاب-پاتەرىندە تانىستىرىپ، وسى ۇيىمنىڭ قولداۋىمەن ونى حالىقارالىق دەڭگەيدە جۇزەگە اسىرۋ ۇسىنىلدى. قازاق ۇلتتىق ۋنيۆەرسيتەتى «رۋحاني جاڭعىرۋ» باعدارلاماسى اياسىندا بۇۇ وركەنيەتتەر اليانسىمەن بىرلەسىپ «قايىرىمدى قوعام ازاماتتارىن قالىپتاستىرۋ. قازىرگى زامانعى ۋنيۆەرسيتەتتەردىڭ ميسسياسى» اتتى حالىقارالىق جوبانى جۇزەگە اسىرۋدا.

ءال-فارابي اتىنداعى قازاق ۇلتتىق ۋنيۆەرسيتەتى تۇركيا، يوردانيا، يتاليا، قىتاي، مىسىر، بولگاريا جانە باسقا ەلدەردىڭ جەتەكشى ۋنيۆەرسيتەتتەرىندە ءال-ءفارابيدىڭ عىلىمي-ءبىلىم بەرۋ ورتالىقتارىن اشىپ، تابىستى جۇمىس اتقارۋدا، وندا قازاق حالقىنىڭ مادەنيەتى مەن ءداستۇرى ناسيحاتتالىپ، قازاق ءتىلى وقىتىلۋدا.

"The Qazaq Times"