وزبەكستان تالاپتاردى ورىنداماسا، شۆەيتساريا گۇلنارا كارىموۆا اكتيۆتەرىن قايتارمايدى.

شىلدە ايىنىڭ 27-ءى كۇنى شۆەيتسارياداعى وزبەكستان ءجۋرناليسى الىشەر تاكسانوۆ سىرتقى ىستەر مينيسترلىگىنە گۇلنارا كارىموۆاعا تيەسىلى قارجى اكتيۆتەرىن ەلگە قايتارۋعا قاتىستى اشىق حات جولدادى. وندا ول بۇعاتتالعان اكتيۆتەردىڭ قايدا ەكەندىگىن جانە قانداي كەلىسىم بويىنشا قايتارىلاتىندىعىن سۇراعان.

29 شىلدە كۇنى شۆەيتساريا ءسىم جۋرناليست ساۋالىنا جاۋاپ بەردى. ۆەدومستۆا جاريالاعان قۇجات بويىنشا، گۇلنارا كارىموۆا اكتيۆتەرى وزبەكستانعا زاڭدىق پروتسەدۋرالار اياقتالعاننان كەيىن قايتارىلادى. ونىڭ وزىندە رەسمي تاشكەنت قارجى حالىق پەن مەملەكەت يگىلىگىنە جۇمسالاتىنىنا كەپىلدىك بەرۋى ءتيىس.

«زاڭسىز جولمەن كەلگەن اكتيۆتەر شۆەيتساريا اۋماعىندا جۇرگىزىلىپ جاتقان تەكسەرۋ جۇمىستارى اياقتالعاننان كەيىن قايتارىلادى. 2012 جىلى فەدەرالدى پروكۋراتۋرا گۇلنارا كارىموۆاعا تيەسىلى 800 ميلليون شۆەيتساريا فرانكىن بۇعاتتاعان. قازىرگى تاڭدا تەكسەرۋ جۇمىستارى جۇرگىزىلىپ جاتىر... ءبىر جىل بۇرىن فەدەرالدى كەڭەس وزبەكستانعا بۇعاتتالعان قارجىنى تولىقتاي قايتارۋعا بايلانىستى شەشىم شىعارعان. ءتيىستى ورگاندارمەن جۇرگىزىلگەن جۇمىستاردان كەيىن ەكى كەلىسىم قابىلدانادى. ءبىرىنشىسى، اكتيۆتەردى وزبەكستانعا تولىقتاي قايتارۋ پرينتسيپتەرىن انىقتاۋ. ەكىنشىسى، قارجىنى قايتارۋ جولدارىن باقىلاۋ. بۇنىڭ بارلىعى اكتيۆتەردى اشىق ءارى تازا جولمەن حالىق پەن مەملەكەتتىڭ دامۋىنا جۇمسالاتىندىعىنا كوز جەتكىزۋ ماقساتىندا ىسكە اسىپ جاتقان پروتسەدۋرالار» - دەلىنگەن ءسىم تاراتقان مالىمدەمەدە.

گۇلنارا كارىموۆانىڭ ۇستىنەن قىلمىستىق ءىس 2015 جىلى قوزعالعان. ءدال وسى جىلى تاشكەنت قالالىق سوتى ونى "اسا ءىرى كولەمدە قارجى جىمقىرۋ", "بوپسالاۋ", "سالىقتان جالتارۋ" ايىپتارى بويىنشا كىنالى دەپ تانىپ، بەس جىلعا باس بوستاندىعىنان ايىرعان. 2017 جىلى شىلدەدە وزبەكستان باس پروكۋراتۋراسى گۇلنارا كارىموۆانىڭ ۇستىنەن تاعى بىرنەشە قىلمىس بويىنشا ءىس قوزعالعاندىعىن مالىمدەدى. وزبەكستان رەسمي ورگاندارىنىڭ مالىمدەمەسىنەن كەيىن وعان تيەسىلى الەمنىڭ 12 ەلىندەگى بانك شوتتارى مەن جىلجىمايتىن مۇلىكتەرى بۇعاتتالعان. كارىموۆاعا قارسى ەكى قىلمىستىق ءىس بويىنشا مەملەكەتكە كەلتىرىلگەن زالالدىڭ جالپى سوماسى 2 ملرد دوللار.

"The Qazaq Times"