سوورونباي جەەنبەكوۆ قىرعىزستاننىڭ بۇرىنعى پرەزيدەنتى المازبەك اتامباەۆقا قاتىستى مالىمدەمە جاسادى.

جەەنبەكوۆ سوزىندە: «اتامباەۆتىڭ تەرگەۋگە شاقىرىلۋى – زاڭدى قۇبىلىس. اتامباەۆ ءىسى زاڭ اياسىندا شەشىلۋى ءتيىس. بارلىق ادام – بۇرىنعى پرەزيدەنت پە، شەنەۋنىك پە، الدە باسقا ماماندىق يەسى مە، تۇگەلدەي دەرلىك زاڭعا باعىنۋعا مىندەتتى. اتامباەۆ ءىسى قىرعىزستان زاڭناماسىمەن شەشىلۋى ءتيىس. زاڭ الدىندا بارلىعى بىردەي. سوندا عانا مەملەكەت العا باسادى»، – دەپ مالىمدەدى.

27 ماۋسىمدا قىرعىزستان پارلامەنتى المازبەك اتامباەۆتى ەكس-پرەزيدەنت جانە تيىسپەۋشىلىك مارتەبەسىنەن ايىرعان. جوعارى كەڭەستە قۇرىلعان ارنايى كوميسسيا ەكس-پرەزيدەنت المازبەك اتامباەۆقا جەمقورلىققا جول بەردى، قىزمەتىن اسىرا پايدالاندى سىندى پۋنكتتەر بويىنشا بەس ايىپ تاعىپ وتىر. قىرعىزستان ىشكى ىستەر مينيسترلىگىنىڭ ترەگەۋ توبى جاۋاپ الۋ ماقساتىندا ءۇش رەت شاقىرعان. دەگەنمەن، ۇشەۋىنە دە بارۋدان باس تارتقان اتامباەۆ كونستيتۋتسيالىق پالاتاعا حات جولدادى.

25 شىلدەدە ماسكەۋدە رەسەي پرەزيدەنتى ۆلاديمير پۋتينمەن كەزدەسكەن اتامباەۆ ەلگە ورالعان سوڭ ارنايى مالىمدەمە جاساعان. اتامباەۆ سوزىندە: «رەسەي قىرعىزستاننىڭ دوسى ءارى ستراتەگيالىق ارىپتەسى ەكەنىن تاعى ءبىر مارتە دالەلدەدى. الايدا ەلدىڭ ىشكى ماسەلەلەرىن ءبىز ءوزىمىز شەشەمىز. بيلىك سوتتا ءىستى قاراعان كەزدە ادىلدىك تانىتۋى كەرەك. قارسىلاستاردى ساياسي قۋدالاۋدى توقتاتقان دۇرىس. جەەنبەكوۆ تاراپىنان وسىنداي قادامدى كورگەن كەزدە وپپوزيتسيانىڭ كۇن ءتارتىبى بىردەن وزگەرەدى. جەەنبەكوۆتىڭ ەل يگىلىگى ءۇشىن جۇمىس ىستەي باستاعانىن جانە وپپوزيتسيانىڭ سايلاۋعا دايىندالىپ جاتقانىن كورگەن كەزدە عانا حالىق تىنىشتانادى. ساياسي تۇراقتىلىق ورنايدى. ءبىز بيلىك تاراپىنان ناقتى ءىس-ارەكەتتى قىركۇيەككە دەيىن كۇتەمىز»، – دەدى.

"The Qazaq Times"