وڭتۇستىك كورەيا ازاماتتارى جەرلەرىنە سوعىس بىلتەسىن ورناتۋعا قارسى

8 ناۋرىز كۇنى، وڭتۇستىك كورەيا «ساد» جۇيەسىن ورناتۋعا بەكىتكەن «سەوڭجۋ» گولف الاڭىنا جاقىن سولتۇستىك گەنسان، سەوڭجۋ ايماعىنىڭ تۇرعىندارى جاپپاي ەرەۋىلگە شىعىپ، «ساد» جۇيەسىن ورناتۋعا قارسىلىقتارىن ءبىلدىردى. نارازىلىق سوڭى ەرەۋىلشىلەر مەن پوليتسەيلەر اراسىندا جانجالعا ۇلاستى. بۇل تۋرالى قىتايلىق «شينحۋ» اگەنتتىگىنىڭ رەسمي سايتى حابارلاپ وتىر.

فوتو: Sputnik Internatinol

«ساد» جۇيەسى ورناتىلادى دەپ تۇراقتاندىرىلعان سەوڭجۋ ايماعىنىڭ تۇرعىندارى، ۇكىمەت قارارى شىققالى ءوز قارسىلىقتارىن توقتاۋسىز ءبىلدىرىپ كەلە جاتىر. ولار ءوز مەكەندەرىن شىعىس ازيا تىنىشتىعىنا قاتەر توندىرەتىن قارا نۇكتەگە اينالدىرعىسى كەلمەيدى. زىمىران شۋىلىنان جانە قورشاعان ورتانىڭ وزگەرىسكە ۇشىراۋىنان الاڭدايدى.

كەشە، 8 ناۋرىزدا، ەرەۋىلدى تاراتپاق بولعان پوليتسەيلەرگە كۇشتى قارسىلىق بولدى. ولار ۇكىمەتتىڭ حالىقتىڭ پىكىرىمەن ساناسىپ، «ساد» زىمىرانعا قارسى جۇيەسىن ورناتۋدان باس تارتۋىن تالاپ ەتۋدە. ەرەۋىلشىلەردىڭ ايتىسىنا قاراعاندا قارسىلىق شاراسى بۇنىمەن توقتاپ قالمايدى. ەل استاناسى سەۋلدە دە ۇلكەن الاڭدار مەن اقش-تىڭ كورەياداعى ەلشىلىگى الدىندا دا قارسىلىق قيمىلدارى جۇرىلمەك.

وڭتۇستىك كورەيانىڭ ەل ازاماتتارىنىڭ قارسىلىعى مەن كورشىلەس ەلدەردەن كەلەتىن قىسىمعا قاراماستان، ونسىزدا بۇلىنگەلى تۇرعان كورەي تۇبەگى ماسەلەسىن ۋشىقتىرىپ، «ساد» زىمىرانعا قارسى جۇيەسىن ورناتۋى، ءوز شەشىمىنەن كورى، اقش-تىڭ مۇددەسى مەن ىقپالىنا جىعىلعاندىق دەۋگە بولادى.

“The Qazaq Times”