ترامپ زەلەنسكيگە قوڭىراۋ شالدى

اقش پرەزيدەنتى دونالد ترامپ پەن ۋكراينا پرەزيدەنتى ۆلاديمير زەلەنسكي تەلەفون ارقىلى سويلەستى.

اق ءۇي ءباسپاسوز قىزمەتىنىڭ حابارلاۋىنشا، زەلەنسكيگە قوڭىراۋ شالعان ترامپ ۋكرايناداعى پارلامەنت سايلاۋىندا باسقارۋشى بيلىككە قاراستى «حالىق قىزمەتشىسى» پارتياسىنىڭ جەڭىسكە جەتۋىمەن قۇتتىقتاعان. سونىمەن قاتار، ەكى ەل باسشىسى اقش پەن ۋكراينا اراسىنداعى ديپلوماتيالىق، ەنەرگەتيكالىق جانە ەكونوميكالىق بايلانىستاردى تالقىلاعان.

ءوز كەزەگىندە ترامپ زەلەنسكيدىڭ ەلدەگى جەمقورلىق سالدارىمەن كۇرەس جۇرگىزەتىنىنە سەنىم بىلدىرگەن. ال زەلەنسكي ۋاشينگتوننىڭ ماسكەۋگە باعىتتالعان سانكتسيالار پاكەتىن قولدايتىنىن ايتىپ، اقش-قا العىس بىلدىرگەن.

21 مامىردا يناۋگۋراتسياسىنان كەيىن اقش جانە ەۋروپالىق وداق وكىلدەرىمەن كەزدەسكەن زەلەنسكي رەسەيدىڭ اگرەسسيالىق ساياساتىنا قارسى سانكتسيا ەنگىزگەنى ءۇشىن ەكى تاراپا العىس بىلدىرگەن. سونىمەن قاتار، زەلەنسكي سوزىندە: «امەريكا تارابى رەسەيگە قارسى سانكتسيالاردى كۇشەيتۋدى جالعاستىرسا ەكەن دەيمىز. اقش – ۋكراينانىڭ رەسەي اگرەسسياسىنا قارسى تۇرۋدا قۋاتتى ءارى ءىرى سەرىكتەستەرىنىڭ ءبىرى»، – دەپ مالىمدەگەن.

9 شىلدەدە ۋكراينا پرەزيدەنتى ۆلاديمير زەلەنسكي رەسەي پرەزيدەنتى ۆلاديمير ءپۋتيندى ەۋروپا ەلدەرىنىڭ باسشىلارى باس قوساتىن جاڭا فورماتتاعى كەزدەسۋدە پىكىرسايىس وتكىزۋگە شاقىرعان بولاتىن. زەلەنسكي سوزىندە: «سويلەسۋ كەرەك بولسا، سويلەسەيىك. قىرىمنىڭ كىمگە تيەسىلى ەكەنىن، دونباسستا كىمدەردىڭ جوقتىعىن تالقىلايىق. كەزدەسۋگە مەن، ۆلاديمير پۋتين، اقش پرەزيدەنتى دونالد ترامپ، ۇلىبريتانيا پرەمەرى تەرەزا مەي، گەرمانيا كانتسلەرى انگەلا مەركەل، فرانتسيا پرەزيدەنتى ەممانۋەل ماكروندار كەلسە دەگەن ۇسىنىس بار. وتەتىن ورنى؟ مەنىڭشە، الەكساندر گريگورەۆيچ لۋكاشەنكو مينسكىدە ءبىزدى قۋانا قارسى الادى»، – دەگەن. زەلەنسكيدىڭ بۇل باستاماسىنا بەلارۋس پرەزيدەنتى الەكساندر لۋكاشەنكو قولداۋ ءبىلدىرىپ وتىر. ال رەسەي پرەزيدەنتىنىڭ ءباسپاسوز حاتشىسى دميتري پەسكوۆ ماسكەۋدىڭ الداعى كۇندەرى جاۋاپ بەرەتىنىن ايتتى. تەلەفون ارقىلى سويلەسۋ كەزىندە ترامپ پەن زەلەنسكيدىڭ اتالعان كەزدەسۋ جايلى قانداي شەشىم قابىلداعانى ازىرگە بەلگىسىز.

"The Qazaq Times"