فوتو: ازاتتىق راديوسى

الماتىدا جۋرناليستەرگە جاسالعان شابۋىلدان كەيىن عالامتور ارقىلى ازاتتىقتان «كەشىرىم سۇراعان» ەكى ايەلدىڭ ءسوزى جازىلعان ۆيدەو تارادى.

تۇندە تۇسىرىلگەن ۆيدەو YouTube-تە بىلتىر تىركەلگەن «ماس كيەۋبالا» كانالىندا جاريالانعان. وندا اتى-ءجونىن اتاماعان ايەلدەر الماتىداعى ادام قۇقىعى مەن زاڭدىلىقتى ساقتاۋ بيۋروسىنىڭ «ءباسپاسوز زالىنا كىرە الماي، دورەكى ءسوز ەستىگەننەن كەيىن» ۇرىسىپ، الگىندەي قىلىققا بارۋعا ءماجبۇر بولعانىن ايتادى.

ۆيدەوداعى ايەلدەردىڭ ءبىرى «ەگەر ءبىز ازاتتىق راديوسىنا زيان كەلتىرسەك، شىن نيەتىممەن ازاتتىق راديوسىنان كەشىرىم سۇرايمىن» دەسە، ەكىنشىسى «ءبىز ازاتتىق راديوسىنان كەشىرىم سۇراعىمىز كەلەدى، ولاردىڭ ايتۋىنشا، ءبىز زيان كەلتىرگەن ەكەنبىز. ءبىز جاعدايدى ءتۇسىندىرۋ ءۇشىن تەلەفون شالدىق، بىراق ولار قولى بوس ەمەس ەكەنىن ايتتى» – دەيدى.

22 شىلدەدە ازاتتىق تىلشىلەرى ادام قۇقىقتارى مەن زاڭدىلىقتى ساقتاۋ بيۋروسىنداعى «مەملەكەت انالار جانە بالالارمەن كۇرەسىپ وتىر» دەگەن تاقىرىپتا ءوتۋى ءتيىس ءباسپاسوز جيىنىنا بارعان. بۇل جيىندى ۇيىمداستىرۋشىلارى ەلدە تىيىم سالىنعان «قازاقستاننىڭ دەموكراتيالىق تاڭداۋى» قوزعالىسى (قازاقستان بيلىگىن سىناۋشى، قازىر شەتەلدە تۇراتىن قۋعىنداعى بۇرىنعى بانكير مۇحتار ءابليازوۆ قۇرعان) قىزمەتىنە قاتىسى بار دەگەن كۇدىكپەن تۇتقىندالعان الماتىلىق كوپ بالالى انا وكسانا شەۆچۋك پەن جالعىزباستى انالار گۇلزيپا جاۋكەروۆا مەن جازيرا دەمەۋوۆانىڭ ۇستەرىنەن قوزعالعان ىستەردىڭ ءمان-جايىن ايتپاقشى بولعان ەدى. الايدا، سول مەزەتتە ازاتتىق ءتىلشىسى نۇرگۇل تاپاەۆا مەن وپەراتور توقمولدا قۇسايىنوۆقا بەلگىسىز بىرەۋلەر شابۋىل جاساعان. عيماراتتىڭ ءبىرىنشى قاباتىندا جۋرناليستەرگە تارپا باس سالعان بەس ايەل ازاتتىق تىلشىلەرىنە قول جۇمساپ، تەحنيكاسىن بۇلدىرگەن.

بەلگىلى بولعانداي، ازاتتىق رەداكتسياسىنا جانە دۇيسەنبىدە شابۋىلعا ۇشىراعان ازاتتىق جۋرناليستەرىنە بۇعان دەيىن كەشىرىم سۇراپ ەشكىم حابارلاسپاعان.

"The Qazaq Times"