بەساعاش تۇرعىندارى الماتى-تالعار جولىن جاۋىپ تاستادى

الماتى وبلىسى تالعار اۋدانىنا قاراستى بەساعاش اۋىلىنىڭ تۇرعىندارى شەشىم تاپپاعان اۋىز سۋ ماسەلەسىنە بايلانىستى نارازىلىق ءبىلدىرىپ، الماتى-تالعار جولىن جاۋاپ تاستادى.

بەساعاش تۇرعىندارىنىڭ ايتۋىنشا، اۋىلدىڭ جارتىسى قالالىق اۋىز سۋ جەلىسىنە جالعانعان، قالعان جارتىسىن تالعار اۋدانى سۋمەن قامتۋعا ءتيىس. بەساعاش اۋىلىن سۋمەن قامدايتىن سۋ قويماسى «تاس-قۇم اقساي» جشس-نىڭ مەنشىگىنە ءوتىپ كەتكەن. ولار جاز بويى شامامەن 25 مىڭنان استام تۇرعىنى بار اۋىلعا  سۋدى تولىق بەرمەيدى.

بەساعاش تۇرعىندارى  اۋىز سۋ ماسەلەسى بويىنشا بۇدان بۇرىن دا، ياعني 1 شىلدە كۇنى دە نارازىلىق شاراسىنا شىققان. سول رەتتە دە الماتىعا كىرەتىن نەگىزگى جولداردىڭ ءبىرىن جاۋىپ، اكىمشىلىك تارابىنان اۋىز سۋ ماسەلەسىن شەشىپ بەرۋدى تالاپ ەتكەن بولاتىن. تالعار اۋدانىنىڭ اكىمى بىردەن كەلىپ حالىقپەن كەزدەسكەن جانە 4 كۇن ىشىندە بارلىق ماسەلەنىڭ شەشۋگە ۋادە بەرگەن. ودان كەيىن دە اۋىلدا اۋىز سۋ ءبىر كۇن بار دا، ءبىر كۇن جوق كۇيدە تۇرعان. سوڭعى بىرنەشە كۇندە ءتىپتى سۋ مۇلدە كەلمەگەن. ال، كەشە اۋىلعا ارنايى كولىكتەرمەن سۋ جەتكىزگەن.

«ءوزىڭىز ويلاپ قاراڭىز، ءححى عاسىردا، الماتىنىڭ ىرگەسىندەگى اۋىلدا كولىكپەن سۋ جەتكىزىپ جۇرگەنىن»، – دەيدى اۋىل تۇرعىندارىنىڭ ءبىرى، – «وبلىس اكىمىنىڭ ورىنباسارى كەلگەندە دە «تاس-قۇم اكساي» كومپانياسىنان بۇل ماسەلەنى شەشىپ بەرمەسە، سۋ قويماسىن ۇكىمەتتىڭ قاراماعىنا الاتىنىن ەسكەرتىپ كەتكەن. ودان بەرى دە ۋاقىت ءوتتى. ماسەلە شەشىلگەن جوق، نەگە ۇكىمەت ءوز يەلىگىنە المايدى»، – دەيدى ول.

قازىر دە، بەساعاش تۇرعىندارى الماتى مەن تالعار اراسىنداعى جولدى جاۋىپ، تالعار اۋدانىنىڭ اكىمىن  حالىقپەن كەزدەسۋگە شاقىرۋدا. ەگەر تالعار اكىمى كەلمەسە جولدى تولىق جابامىز دەيدى بەساعاشتىقتار.

“The Qazaq Times”