اقش-تا مەكسيكادان كەلگەن ميگرانتتاردى «الەۋمەتتىك جەلىلەردە مازاق ەتتى» دەگەن ايىپپەن كەدەن قىزمەتكەرلەرىنە قاراستى تەرگەۋ باستالدى.

مالىمەتتەر بويىنشا، قىزمەتكەرلەردىڭ عالامتورداعى جەكە سايتىندا «بوسقىنداردىڭ قۇقىعىن تاپتاۋ، الەۋمەتتىك تەڭسىزدىك ورناتۋعا» باعىتتالعان جازبالار جاريالانىپ كەلگەن. ءبىر پوستتىڭ اۆتورى لاتىن امەريكاسىنان كەلگەن ايەلدى وزەنگە لاقتىرۋدى ۇسىنعان. وسى رەتتە اقش-تىڭ كەدەن-شەكارا قىزمەتى باسشىلىعى مەن شەكارالىق پاترۋل باسشىسى كارل پروۆوست ءتارتىپ بۇزعان قىزمەتكەرلەر جاۋاپكەرشىلىككە تارتىلاتىنىن حابارلادى.

تەحاس قالاسىنداعى ميگرانتتاردى ۇستاۋ ورتالىعىنداعى ساپارىنان كەيىن اقش وكىلدەر پالاتاسىنىڭ مۇشەسى وكاسيو-كورتەس ءوزىنىڭ «تۆيتتەر» پاراقشاسىندا شەكارالىق پاترۋل قىزمەتكەرلەرى ميگرانتتاردى لاس سۋ ىشۋگە ءماجبۇر ەتەدى دەپ جازدى. سونداي-اق ساياساتكەردىڭ ءوزى فيزيكالىق سيپاتتاعى قاۋىپ-قاتەر وبەكتىسىنە اينالعانىن ايتادى. ساپار كەزىندە ول ميگرانتتاردى «مازاق ەتۋ ماقساتىندا» سالىنعان كاريكاتۋرالاردى تاپقان.

شەكارا پاترۋلدەرى قىزمەتىنىڭ رەسمي وكىلى مەتتيۋ كلياين حابارلاعانداي، قازىر ۆەدومستۆو تەرگەۋ جۇرگىزىپ جاتىر. سول سەبەپتى اقش-تىڭ شەكارا پاترۋلدەرى قىزمەتى ازىرگە وكاسيو-كورتەستىڭ جازباسىنا قاتىستى تۇسىنىكتەمە بەرگەن جوق.

تاياۋدا «Washington Post» گازەتى ىشكى قاۋىپسىزدىك مينيسترلىگىندەگى دەرەككوزگە سىلتەمە جاساي وتىرىپ، ميگرانتتارعا ارنالعان ورتالىقتاردا اۋىز سۋ بار ەكەنىن جانە قىزمەت قىزمەتكەرلەرىنىڭ ەشقايسىسى ميگرانتتاردى دارەتحانادان سۋ ىشۋگە ماجبۇرلەمەگەنىن حابارلادى.

رەسمي ستاتيستيكا بويىنشا، اقش شەكاراسىنان مەكسيكالىقتاردىڭ زاڭسىز ءوتۋى 2000 جىلدان باستاپ تومەندەگەن. سول جىلى شەكارادان زاڭسىز وتپەك بولعان 1,6 ملن ادام ۇستالسا، وتكەن جىلى – 400 مىڭ بوسقىن ۇستالعان. بيىل اقپاندا اتالعان ماسەلەنى شەشۋ ءۇشىن دونالد ترامپ مەكسيكامەن شەكارادا توتەنشە جاعداي ەنگىزۋ تۋرالى زاڭ جوباسىن جاريالادى. الايدا، جاقىندا تەحاستاعى ميگرانتتاردى كۇتۋ ورتالىقتارىندا كەلەڭسىز جايتتار ورىن الىپ، جۇزدەگەن بالانىڭ بىرنەشە اپتا بويى اۋىز سۋسىز، تاماقسىز ءومىر ءسۇرىپ كەلگەنى انىقتالعان. وسىعان بايلانىستى اقش كەدەن قىزمەتىنىڭ باسشىسى دجون ساندەرس وتستاۆكاعا كەتتى. اتالعان جايتتان كەيىن وتكەن اپتادا اقش كونگرەسى امەريكا – مەكسيكا شەكاراسىنداعى ميگرانتتارعا 4,5 ملرد دوللار گۋمانيتارلىق كومەك كورسەتۋ تۋرالى قاۋلىنى بەكىتتى. بولىنگەن قارجىنىڭ 3 ميلليارد دوللارى ەل اۋماعىنا اتا-اناسىز كەلگەن بالالاردى كۇتۋگە جۇمسالادى. ال 1 جارىم ميللياردتان استام دوللار زاڭسىز ميگرانتتاردى ازىق-تۇلىك جانە باسپانامەن قامتاماسىز ەتۋگە ارنالادى.

 

"The Qazaq Times"