اسقار سابدين سەمينار ساباعىن جۇرگىزدى. فوتو: قازاقستانداعى لاڭكەستىك جانە ەكسترەميزم ماسەلەلەرىن زەرتتەۋ ورتالىعى.

بۇگىن الماتى قالاسىنداعى ازاماتتىق ورتالىقتا (Civil Center Almaty) باق وكىلدەرى مەن بلوگەرلەرگە ارنالعان تەرروريزم، ەكسترەميزم جانە وعان قارسى كۇرەس تاقىرىبىندا سەمينار ءوتتى.

«قازاقستان رەسپۋبليكاسىنداعى لاڭكەستىك جانە ەكسترەميزم ماسەلەلەرىن زەرتتەۋ ورتالىعى» قوعامدىق قورى جاعىنان ۇيىمداستىرىلعان شاراعا الماتى قالاسىنىڭ قوعامدىق دامۋ باسقارماسى قولداۋشىلىق ەتكەنىن ايتا كەتەيىك.

ءدىن، ءدىني ەكسترەميزم مەن تەرروريزمنىڭ الدىن الۋ ماسەلەلەرى بويىنشا باق وكىلدەرىنە جانە بلوگەرلەرگە ارنالعان اقپاراتتىق جانە وقىتۋ سەمينارىن اتالعان زەرتتەۋ ورتالىعىنىڭ جەتەكشىسى كاكىمجان بيشمانوۆ پەن تەولوگ-يسلامتانۋشى اسقار سابدين جۇرگىزدى.

سەمينارعا قازاق ءتىلدى باق وكىلدەرى قاتىستى. فوتو: قازاقستانداعى لاڭكەستىك جانە ەكسترەميزم ماسەلەلەرىن زەرتتەۋ ورتالىعى.

قازاق ۇلتتىق ۋنيۆەرسيتەتىنىڭ پروفەسسورى كاكىمجان مۇراتجانۇلى سەميناردىڭ ماقساتى مەن مىندەتتەرىن، باق وكىلدەرىنىڭ ءدىن، ءدىني ەكسترەميزم تاقىرىپتارىن، سوعان قاتىستى ۇعىمداردى جەتتىك ءبىلۋىنىڭ ماڭىزى تۋرالى توقتالىپ، سەمينار ساباعىن باستاپ اشتى. ارى قاراي «نۇر-مۇبارك» ۋنيۆەرسيتەتىنىڭ جانىنداعى ەكسترەميزمنىڭ الدىن الۋ سالاسىنداعى مامانداردى قايتا داياارلاۋ ينستيتۋتىنىڭ ديرەكتورى اسقار قاليجانۇلى يسلام دىنىندەگى ءدىني اعىمدار، تەرروريزم مەن ءدىني-سەبەپتەمەلى ەكسترەميزمگە قارسى ءىس-قيمىلدار تۋراسىنداعى لەكتسياسىن جۇرگىزدى.

سەمينار سوڭىندا قاتىسۋشىلار ءوز سۇراقتارىن ورتاعا سالدى جانە شاراعا بەلسەندى قاتىسۋشىلارعا ارنايى سەرتيفيكاتتار تاراتىلدى.

باق وكىلدەرى مەن بلوگەرلەرگە ارنالعان ەكسترەميزم، تەرروريزم جانە وعان قارسى ءىس-قيمىلدار تاقىرىبىنداعى اتالمىش سەمينار وسىمەن ءۇشىنشى كۇن جالعاسىپ وتىر. الداعى ۋاقىتتا (9-10 شىلدە) كۇندەرى ورىس ءتىلدى جۋرناليستەرگە ارنالعان سەمينار جالعاسپاق.

“The Qazaq Times”