ساۋدا-ساتتىق قورىتىندىسى بويىنشا لوندون مەن نيۋ-يوركتىڭ شيكىزات بيرجالارىندا مۇناي باعاسى قىمباتتادى.

مالىمەتتەر بويىنشا، لوندونداعى ICE Futures بيرجاسىندا قىركۇيەكتە جەتكىزىلەتىن Brent ماركالى مۇنايدىڭ فيۋچەرستەرى 1,04 دوللارعا كوتەرىلىپ، باررەلى 63,86 دوللارعا جەتكەن. نيۋ-يورك تاۋار بيرجاسىندا (NYMEX) تامىز ايىندا جەتكىزىلەتىن WTI ماركالى مۇناي باعاسى 1,09 دوللارعا كوتەرىلىپ، ءبىر باررەلى 57,34 دوللار بولدى.

2017 جىلى قازاقستان مۇنايىنىڭ ورتاشا باعاسى تونناسىنا 44 مىڭ تەڭگەگە جەتىپ، 13,6%-عا ارتقان بولاتىن. وسىلايشا، جىل سايىن وتاندىق قارا التىن باعاسى قىمباتتاپ كەلەدى. قازاقستان ەكونوميكاسى مۇناي نارىعىنا تاۋەلدى بولعاندىقتان، شيكىزات باعاسىنىڭ ارزانداپ نەمەسە قىمباتتاۋى ماڭىزدى. سەبەبى ەل بيلىگى ازىرگە ەكونوميكانى قۋاتتاندىراتىن بۇدان باسقا سالاعا بەت بۇرا الماي وتىر.

"The Qazaq Times"