فوتو: kp.kz

گەرمانيا فەدەرالدى ادىلەت دەپارتامەنتى Facebook كومپانياسىنا  2 ملن ەۋرو (900 ملن تەڭگەگە جۋىق) كولەمىندە ايىپپۇل سالدى. كومپانيانى الەۋمەتتىك جەلىدەگى زاڭسىز جاريالانىمدارعا قاتىستى پايدالانۋشىلاردىڭ شاعىمدارى تۋرالى ەسەبى تولىق ەمەس دەپ ايىپتاپ وتىر.

گەرمانيادا 2018 جىلدىڭ قاڭتار ايىنان باستاپ الەۋمەتتىك جەلىلەردىڭ مازمۇنىن باقىلاۋعا مىندەتتەيتىن زاڭ بار. اتالعان زاڭ بويىنشا، الەۋمەتتىك جەلى اكىمشىلىگى 24 ساعات ىشىندە زاڭسىز جاريالانعان پوستتى ءوشىرىپ، 48 ساعات ىشىندە قولدانۋشى شاعىمدارىنا جاۋاپ بەرۋگە ءتيىستى دەپ مىندەتتەلگەن.

سونداي-اق، الەۋمەتتىك جەلىلەر ءار 6 اي سايىن زاڭسىز جاريالانعان پوستتارعا قاتىستى پايدالانۋشىلاردىڭ شاعىمدارى بويىنشا جاسالعان جۇمىس تۋرالى ەسەپ بەرۋى كەرەك. وسى ورايدا، Facebook كومپانياسى ۇسىنعان ەسەپ تولىق ەمەس دەيدى  گەرمانيا فەدەرالدى ادىلەت دەپارتامەنتى. اتاپ ايتقاندا، 2018 جىلدىڭ ءبىرىنشى جارتى جىلدىعىندا تەك قانا 886  وتىنىش جاسالعان، سونىمەن قاتار، الەۋمەتتىك جەلى اكىمشىلىگىنىڭ جاسالعان شاعىمدار بويىنشا قابىلداعان شارالارى تۋرالى دا اقپاراتتىڭ جەتكىلىكسىزدىگى سەبەپ بولعان.

ايتا كەتەيىك، وتكەن جىلدىڭ باسىندا Facebook كومپانياسى ۇلكەن داۋعا قالعان. وعان كەمبريدج اناليتيكانىڭ Facebook-ءتىڭ 87 ميلليون قولدانۋشىسىنىڭ جەكە دەرەكتەرىن زاڭسىز پايدالانۋى سەبەپ بولدى. وسى جانجالعا بايلانىستى ۇلىبريتانيا دا Facebook كومپانياسىنا ايىپپۇل سالعان ەدى. كەيىن ول مالىمەتتەر دونالد ترامپتىڭ 2016 جىلعى سايلاۋالدى ناۋقانىندا پايدالانىلعاندىعى بەلگىلى بولدى. ال، سول جىلدىڭ كوكتەمىندە Facebook-ءتىڭ نەگىزىن قالاۋشى مارك تسۋكەربەرگ اقش كونگرەسىندە جانە ەۋروپارلامەنتتە قاتەسىن مويىنداپ، دەرەكتەردىڭ قولدى بولعانى ءۇشىن كەشىرىم سۇرادى.

"The Qazaq Times"