ەۋرووداق كوشباسشىسى انىقتالماق

بريۋسسەلدە ەۋروپا ەلدەرىنىڭ كوشباسشىلارى كەزەكتەن تىس سامميت وتكىزىپ، وداقتىڭ باسقارۋ قۇرامىن ىرىكتەمەك.

Reuters اگەنتتىگىنىڭ مالىمەتىنشە، 2 شىلدەدە ستراسبۋرگتە قايتا سايلانعان ەۋروپارلامەنتتىڭ العاشقى سەسسياسى وتكىزىلەدى. سەسسيا بارىسىندا زاڭ شىعارۋشى ورگان باسشىسى رەسمي تۇردە تانىستىرىلادى. نەگىزگى تالاپقا سايكەس، باسشىلىق قۇرامىندا ەكى ايەل، باتىس جانە شىعىس ەۋروپا وكىلدەرى، جەتەكشى پارتيالاردىڭ مۇشەلەرى مەن ليبەرالدار بولۋى ءتيىس.

ەۋروكوميسسيانىڭ پرەزيدەنتى لاۋازىمىنا گەرمانيا فەدەراتيۆتى رەسپۋبليكاسىنىڭ كانتسلەرى انگەلا مەركەل مانفرەد ۆەبەر ەسىمدى ۇمىتكەردى ۇسىنعان. جەرگىلىكتى تەلەارنالارعا سۇحبات بەرگەن مەركەل: «بىزگە ەۋروپارلامەنتپەن ماقۇلدانعان ورتاق پىكىر ماڭىزدى. سوندىقتان ەۋروكەڭەستىڭ پرەزيدەنتى دونالد تۋسكتان ءارتۇرلى پارلامەنتتىك توپتارمەن كەڭەسىپ الۋىن سۇرادىق. سوسىن بىزگە ءوزارا ۋاعدالاستىق كەرەك. ەۋروكەڭەس پەن پارلامەنتتىڭ بارلىق وكىلىمەن پىكىرىمىز ءبىر بولسا، ىشكى تۇراقتىلىعىمىز دا بۇزىلمايدى»، – دەپ مالىمدەدى.

ال فرانتسيا پرەزيدەنتى ەممانۋەل ماكرون Brexit بويىنشا كەلىسسوز جۇرگىزۋشى ميشەل بارنەنى لايىقتى كانديدات دەپ سانايدى. «گەرمانيا تاراپى ۇسىنىپ وتىرعان ۇمىتكەرگە قارسىلىعىم جوق. الايدا انگەلا مەركەلدىڭ ءوزى ۇمىتكەر بولسا، وعان ءبىراۋىزدان قولداۋ كورسەتەر ەم. سەبەبى، ونىڭ پرەزيدەنت بولۋعا قارىم-قابىلەتى جەتكىلىكتى»، – دەيدى ماكرون.

"The Qazaq Times"