اقش پرەزيدەنتى مەن مەملەكەتتىك حاتشىسى ءبىر كۇندە ەكى ءتۇرلى مالىمدەمە جاسادى

اقش پرەزيدەنتى دونالد ترامپ كەزەكتى سوڭعى مالىمدەمەلەرىنىڭ بىرىندە، ورمۋز بۇعازىنداعى مۇناي تاسىمالداۋ جولدارىنىڭ قاۋىپسىزدىگىنە تەك قانا اقش جاۋاپ بەرمەيتىنىن، قىتاي قاتارلى وزگە دە ەلدەردىڭ بۇل جاۋاپكەرشىلىكتى ءبولىسۋى كەرەك ەكەنىن جەتكىزدى.

اقش پرەزيدەنتى سوزىندە: «قىتاي مۇناي يمپورتىنىڭ 91 پايىزى ورمۋز بۇعازىنان وتەدى، جاپونيادا 62 پايىزدى يەلەيدى. بۇدعان وزگە دە ەلدەر بار. نەگە كوپتەگەن ەلدەر پايدالاناتىن سۋ جولىن كوپتەگەن جىلدار بويى ءبىز تولەمسىز قاداعالاۋىمىز كەرەك»، – دەگەن.

ورمۋزداعى مۇناي تانكەرى جانە اقش اسكەري كەمەسى. فوتو: USAF.

پرەزيدەنت ترامپتىڭ ايتۋىنشا ورمۋز بۇعازى ارقىلى وتەتىن مۇنايدى پايدالاناتىن بارلىق ەل ءوز رەيستەرىن قورعاۋعا مىندەتتى. «بىزگە ەندى ول جەردە بولۋ كەرەك ەمەس، سەبەبى، اقش قازىر الەمدەگى ەڭ ءىرى ەنەرگيا ءوندىرۋشى ەل بولدى»، – دەدى ترامپ.

پرەزيدەنت ترامپ، سونداي-اق، اقش-تىڭ يرانعا قويعان تالاپتارىندا قايتالاپ وتكەن. ول قۇراما شتات يراننان وتە قاراپايىم نارسەنى – يادرولىق قارۋدى دامىتپاۋ جانە تەرروريزمدى قولداماۋدى تالاپ ەتىپ وتىرعانىن ايتقان.

بىراق، اقش مەملەكەتتىك حاتشىسى مايك پومپەو مەن پرەزيدەنت ترامپتىڭ ءبىر كۇندەگى پىكىرى ۇقساماي شىقتى. ساۋد ارابياسىنىڭ پاتشاسى سالمان ابدۋل-ازيز ءاس-ساۋدپەن كەزدەسۋدەن كەيىن پومپەو ورمۋز بۇعازىنىڭ قاۋىپسىزدىگى مەن حالىقارالىق اشىق سۋ جولى قۇقىعىن قورعاۋدى ارتتىرۋ تۋرالى كەلىسكەنىن ايتقان.

 “The Qazaq Times”