ارىستا توتەنشە جاعداي سالدارىمەن كۇرەس جالعاسىپ جاتىر.

قورعانىس مينيسترلىگىنىڭ رەسمي وكىلى سەرىك بورامباەۆتىڭ مالىمەتىنشە، قازىرگى ۋاقىتتا قالا اۋماعىنا قارۋلى كۇشتەردىڭ 1 مىڭ 800-گە جۋىق اسكەري مامانى تارتىلدى. بۇعان قوسا، 50-دەن اسا ارنايى تەحنيكا جۇمىلدىرىلعان. ال اۋەدە 7 ۇشۋ اپپاراتى باقىلاۋ جۇرگىزىپ ءجۇر. ونىڭ ەكەۋى قاشىقتىقتان باسقارىلاتىن بارلاۋ قۇرالدارى.

وسىعان دەيىن پرەمەر-مينيستر اسقار ءمامين: «مەملەكەت باسشىسى ارىستاعى وقيعا ورنىنا باردى. قاسىم-جومارت توقاەۆ تاپسىرمالار بەردى. ءتيىستى شارالار ۇيىمداستىرىلىپ، ارىس حالقى قاۋىپسىز ايماقتارعا كوشىرىلدى. وكىنىشكە وراي ءبىر تۇرعىن مەن ءبىر اسكەري قىزمەتكەر كوز جۇمدى. تۋعان-تۋىستارىنا قايعىرا كوڭىل ايتامىن. زارداپ شەككەندەرگە مەديتسينالىق كومەك كورسەتىلۋدە»، – دەپ حابارلاعان بولاتىن.

ەسكە سالا كەتەيىك، 24 ماۋسىمدا ارىس قالاسىنداعى اسكەري قومالاردىڭ بىرىندە جارىلىس بولعان. باستاپقىدا قورعانىس مينيسترلىگى جارىلىس سالدارىنان ەشقانداي ادامنىڭ زارداپ شەكپەگەندىگىن ايتىپ، مالىمدەمە تاراتقان. كەيىنەن الەۋمەتتىك جەلىلەردە جاراقات العان ادامداردىڭ بەينەروليكتەرى تارادى.

"The Qazaq Times"