يران ءسىم باسشىسى: اقش ديپلوماتيانى ۇناتپايدى، سوعىستى اڭساپ تۇرادى

امەريكا قۇراما شتاتتارىنىڭ پرەزيدەنتى يرانعا قارسى جاڭا سانكتسيا سالۋ تۋرالى بۇيرىققا قول قويدى. جاڭا سانكتسيا تالاپتارىنا يراننىڭ رۋحاني كوسەمى اياتوللا حومەيني جانە ونىڭ جاقىندارىنىڭ بانك ەسەپ شوتتارىن بۇعاتتاۋ دا كىرەدى.

اقش پرەزيدەنتى كەزەكتى سانكتسيانى يراننىڭ اقش-قا تيەسىلى ۇشقىشسىز ۇشۋ قۇرىلعىسىن اتىپ تۇسىرگەنىنە قارسى جاسالعانىن ايتقان. الايدا، اق ءۇيدىڭ وزگە دە لاۋازىمدى تۇلعالارى بۇل سانكتسيا تالاپتارى بۇعان دەيىن دايىندالعانىن بىلدىرگەن.

اق ءۇيدىڭ كەزەكتى شەشىمىنەن كەيىن مالىمدەمە جاساعان يران ءسىم باسشىسى جاۆاد زاريف: «قۇراما شتات ديپلوماتيانى ۇناتپايدى. قاشاندا سوعىستى اڭساپ تۇرادى»، – دەگەن پىكىرىن ءبىلدىردى.

سوڭعى بىرنەشە ايدا اقش-يران قايشىلىعىنىڭ اسقىنىپ، سوعىس قاۋپىنە جاقىنداعانى بارشاعا بەلگىلى. تاراپتاردىڭ جوعارى لاۋازىمدىلارى سوعىستى قالامايتىنىن كەزەك-كەزەك مالىمدەگەنىمەن، بىراق جاعداي بارعان سايىن كەرى كەتتى. سوڭعى ەكى اي ىشىندە اقش-تىڭ ورتا، تاياۋ-شىعىستاعى اسكەري كۇشتەرى دايىندىق ۇستىندە تۇردى. سەبەبى، مامىر مەن ماۋسىم ايلارىندا پارسى شىعاناعىندا جانە سوعان جاقىن اۋماقتا بىرنەشە مۇناي تانكەرىنە شابۋىل جاسالدى. اقش تارابى بۇل ءۇشىن يراندى ايىپتادى.

«داۋدىڭ باسى دايرابايدىڭ كوك سيىرى» – اقش-يران اسقىنعان داۋدىڭ باسى پرەزيدەنت ترامپتىڭ 2015 جىلى يران مەن التى ەل قول قويعان يادرولىق كەلىسىمنەن ءبىر تاراپتى شىعىپ كەتۋىنەن باستالدى. ارينە، اقش پرەزيدەنتىنىڭ بۇل ارادا وزىندىك «سىلتاۋلارى» دا بولدى. الايدا، ءتۇبىن قۋساق قازىرگى تەكە-تىرەكستىڭ تىرەلەتىن تيەگى سول قادامدا جاتىر.

ەندى مىنە يراننىڭ اتوم ەنەرگياسى ۇيىمىنىڭ جەتەكشىسى 27 ماۋسىمنان باستاپ يراننىڭ بايىتىلعان ۋران 300 كيلو-گرامعا دەيىن جەتەتىنىن مالىمدەدى. بۇل 2015 جىلى قول قويعان كەلىسىمنىڭ ەڭ جوعارى شەگى.

“The Qazaq Times”