يمامۇعلۋن قولداۋشىلار. فوتو: BBC.

تۇركيا بيلىگىندەگى "اقيقات جانە دامۋ" پارتياسى ستامبۋلداعى سايلاۋدا ەكىنشى رەت ۇتىلىپ قالدى. ستامبۋلدىڭ مەرىن سايلاۋ ءۇشىن بولعان باسەكەدە وپپوزيتسيالىق پارتيا وكىلى ەكرەم يمامۇعلۋ 54 پايىزدان استام داۋىسپەن جەڭىسكە جەتتى. 

ناۋرىز ايىندا وتكەن سايلاۋدا پرەزيدەنت ەردوعان باسقارعان پارتيا ويلاماعان جەردەن ەلدىڭ ءۇش ءىرى قالاسىندا جەڭىلىس تاپتى. الايدا، "اق" پارتيا اتالعان بيلىك پارتياسى داۋىس بەرۋدە بۇرمالاۋشىلىقتار بولعانىن العا تارتىپ، قايتا سايلاۋ وتكىزۋدى تالاپ ەتكەن. الايدا، ەكىنشى رەتكى سايلاۋدا دا انىق باسىمدىقپەن وپپوزيتسيا وكىلى جەڭىسكە جەتتى.

ستامبۋلدىڭ مەرى بولۋعا "اق" پارتيا وكىلى، پرەزيدەنت ەردوعاننىڭ جاقىن جاقتاسى بينالي يلدىرىم تۇسكەن بولاتىن. سايلاۋدان ناتيجەسىنەن كەيىن ەردوعان يمامۇعلۋىن ءوزىنىڭ الەۋمەتتىك جەلى پاراقشاسىندا قۇتتىقتادى.

سايلاۋدىڭ بۇل ناتيجەسى ەردوعان بيلىگى ءۇشىن ۇلكەن سوققى بولدى دەپ باعالانۋدا. سەبەبى، 17 ميلليوننان استام حالقى بار ستامبۋل  ەلدىڭ ءىرى قارجى جانە ەكونوميكالىق ورتالىعى بولىپ سانالادى. سونداي-اق، ستامبۋل ەردوعاننىڭ جەكە ءومىرى ءۇشىن دە اسا ماڭىزدى دەپ ايتۋعا بولادى. ول ءوزىنىڭ ساياسي كارەراسىن وسى قالادان باستاپ قالاعان. 1994 جىلى سايلاۋدا جەڭىپ شىققان ەردوعان ستامبۋلدىڭ مەرى بولدى جانە تۇركياداعى ۇلكەن ساياساتقا ارالاسا باستادى. ونىڭ ۇستىنە "ستامبۋلدا جەڭىسكە جەتكەن ادام، تۇركيادا دا جەڭىسكە جەتەدى" دەگەن ءسوزدى ەردوعان زامانىنا ءتان يديوما دەۋگە بولادى.

ستامبۋلدىڭ جاڭا باسشىسى قالا مەن ەلدىڭ ەۋروپا بولىگىندە "جاڭا ءداۋىردىڭ" پاراقشاسى اشىلدى دەپ مالىمدەدى جانە پرەزيدەنت ەردوعانمەن سەلبەسۋگە دايىن ەكەنىن ءبىلدىردى. يمامۇعلۋنىڭ جۇزدەگەن جاقتاستارى كوشەگە شىعىپ جەڭىستى مەرەكەلەۋى دە وپپوزيتسيالىق پارتيانىڭ بەدەلىن ارتتىردى.

“The Qazaq Times”