دونالد ترامپ. فوتو: The Wall Street Journal

اقش پرەزيدەنتى دونالد ترامپتىڭ جانىنان تاعى ءبىر رەسەيشىل شەنەۋنىك تابىلدى.  وسىدان بۇرىن مايكل فلينن رەسەيلىك ەلشىمەن جەكە كەزدەسىپ، اقش-تىڭ مەملەكەتتىك قۇپيالارىن تالقىلادى دەپ ايىپتالىپ، جۇمىستان بوساتىلعان ەدى.  1 ناۋرىز كۇنى «Washington Post» باسىلىمى ترامپ كومانداسىنداعى تاعى «رەسەيمەن استاسقان» لاۋازىمدىنىڭ اتىن اتادى.

اتالعان باسىلىمدا، وتكەن جىلى پرەزيدەنت سايلاۋى كەزىندە، وسى كەزدەگى اقش ادىلەت ءمينيسترى جەف ءساشونستىڭ (Jeff Sessions) رەسەيدىڭ اقش-تاعى باس ەلشىسىمەن ەكى مارتە جەكەلەي كەزدەسكەنى تۋرالى ماقالا جاريالاندى. بۇل ترامپ كومانداسىن «ساتقىن» ەتىپ كورسەتكەن ەكىنشى ادام بولدى. وسىدان بۇرىن اق ءۇي قاۋىپسىزدىك جونىندەگى باس كەڭەسشى مايكل فلينن «رەسەيشىل ساتقىن» بولىپ ايىپتالعان بولاتىن. ارت-ارتىنان تۋىلعان بۇل ىستەر ترامپ كومانداسىنىڭ ۋاشينگتونداعى سەنىمىنە سىزات سالاتىنى انىق. ونسىز دا قارسىلىقتارعا كوپتەپ ۇرىنىپ، تاريحتاعى ەڭ داۋلى پرەزيدەنت اتالعان ترامپقا باس اۋىرتار پروبلەما تابىلىپ-اق تۇر.

1 ناۋرىز كۇنى، «Washington Post»-تان باسقا دا اقش-تاعى بەدەلدى باسىلىمداردىڭ ءبىر قاتارى، ءساشونستىڭ وتكەن جىلى شىلدە ايىندا ۋاشينگتوندا وتكەن ءبىر رەتكى تالقى كەڭەستە كوپتەگەن ەلدەردىڭ باس ەلشىلەرىمەن كەزدەسكەنىن، سونىڭ اراسىندا رەسەيدىڭ اقش-تاعى جوعارى ەلشىسى سەرگەي كيسلياكپەن دە بەيرەسمي اڭگىمەدە بولعانىن حابارلادى. ال، وتكەن جىلدىڭ قىركۇيەك ايىندا كەڭسەسىندە كيسلياكپەن تەلەفون ارقىلى سويلەسكەنى دە ءمالىم بولدى. ال وسى جىلدىڭ باسىندا كەڭەس پالاتاسى ءماجىلىسى كەزىندە،  ول بۇل ەكى رەتكى كەزدەسۋدى تۋرالى ەشبىر لەبىز بىلدىرمەگەن بولاتىن.

كونگرەس تارابىنان دەموكراتتار پارتياسىنىڭ جەتەكشىسى نەنسي پەلوسي ادىلەت ءمينيسترىنىڭ جۇمىستان بوساتىلۋىن تالاپ ەتتى. اقش پرەزيدەنتى بولسا سايلاۋ كەزىندە دە اقش-رەسەي قارىم قاتىناسىن جاقسارتاتىن سىڭاي تانىتتى جانە پرەزيدەنتتىككە تاعايىندالعاننان كەيىن دە بۇل ويىن ىسكە اسىرعىسى كەلگەن بىرنەشە قادامدارعا باردى. دەگەنمەن اق ۇيدە قالىپتاسقان ء"داستۇر" بويىنشا بۇل قادامدارى قارسىلىقتارعا ۇشىراپ ەدى. سەبەبى، ۋاشينگتوندا تاريحتان بەرى قالىپتاسقان كرەملگە دەگەن سەنىمسىزدىك مىنەزى بار. اقش-رەسەي قاتىناسىنىڭ جاقسارۋىن قالامايتىن مۇددەلى تاراپتار، ترامپ ۇكىمەتىنىڭ ساياساتىنا قولداۋ تانىتپايدى. اق ۇيدەگى قارسىلىق پەن ايىپتاۋلار الدىندا اقش پرەزيدەنتى دونالد ترامپ ىڭعايسىز جاعدايدا قالدى.

“The Qazaq Times”