پاكىستان ءۇندىستاندى كەلىسسوزگە شاقىردى

پاكىستان پرەمەر-ءمينيسترى يمران حان ءۇندىستاننىڭ پرەمەر-ءمينيسترى نارەندرا موديگە حات جولداپ، ەكى ەل اراسىنداعى قايشىلىقتاردى شەشۋ ءۇشىن ديالوگ جۇرگىزۋگە شاقىردى. وتكەن اپتانىڭ سوڭىندا جولداعان بۇل حاتىندا يمران حان مديدى قايتا سايلانۋىمەن دە قۇتتىقتاي كەتكەن.

اتالعان حاتتا پاكىستان تارابى كاشمير داۋىنان تارتىپ، بارلىق داۋلى ماسەلەلەردى شەشۋگە ىنتا تانىتقان. سونداي-اق، يمارن حان موديگە جولداعان حاتىندا، ديالوگ جۇرگىزۋ ەكى ەلدىڭ كەدەيلىكتى ەڭسەرىپ، وڭىرلىك دامۋدى جەبەۋدىڭ بىردەن-ءبىر جولى دەپ كورسەتكەن. ءارى، وڭتۇستىك ازياداعى بەيبىتشىلىكتى قورعاۋدىڭ ماڭىزدىلىعىن كوبىرەك ايتا كەلىپ، ديالوگ جۇرگىزۋ ەكى ەلدىڭ بەيبىتشىلىگى مەن دامۋى ءۇشىن جالعىز عانا جول ەكەنىن جەتكىزگەن.

وسى اپتادا قىرعىزستاننىڭ ورتالىق قالاسى بىشكەكتە شانحاي ىنتىماقتاستىق ۇيىمىنىڭ وتىرىسى وتەدى. جينالىسقا ۇيىمنىڭ جاڭا مۇشەلەرى قاتارىندا ءۇندىستان مەن پاكىستاننىڭ باسشىلارى دا قاتىسادى. ەكى ەلدىڭ بەيبىتشىلىك كەلىسسوزدەرىنە بايلانىستى بۇل ىلگەرلەۋشىلىك، وسى اتالعان سامميت كەزىندە باستاپ جۇزەگە اسادى دەگەن ءۇمىتتى وياتتى.

الايدا، ءۇندىستاننىڭ رەسمي تۇلعالارى جاساعان مالىمەتتە، پرەمەر-مينيستر مودي وسى اپتادا قىرعىزستاندا وتەتىن شانحاي ىنتىماقتاستىق ۇيىمىنىڭ وتىرىسىندا پاكىستان پرەمەرىمەن كەزدەسۋدى جوسپارلاماعانىن ايتادى.  

سوڭعى جىلدارى ءۇندىستان مەن پاكىستان اراسىنداعى قايشىلىق ارتىپ، قارۋلى قاقتىعىستاردا بولدى. ءۇندىستان تارابى كەلىسسوز باستالعانعا دەيىن شەكارالىق تەررورلىق ارەكەتتەردى توقتاتۋدى تالاپ ەتىپ وتىر.

“The Qazaq Times”