8 ماۋسىم – قازاقستاندا تىنىشتىق كۇنى.

سول سەبەپتى بۇگىن سايلاۋعا بايلانىستى كەز كەلگەن ۇگىت-ناسيحاتقا تىيىم سالىنادى. ورتالىق سايلاۋ كوميسسياسىنىڭ حابارلاۋىنشا، تەلەارنالاردان بەلگىلى ءبىر كانديداتقا داۋىس بەرۋگە شاقىراتىن سايلاۋالدى روليكتەر كورسەتىپ، باسىلىم نە ۇنپاراقتار تاراتۋعا، سايلاۋشىلارمەن كەزدەسۋگە تىيىم سالىنعان. مۇنىمەن قاتار، بۇل كۇنى شتاب كانديداتتارى عانا ەمەس، قاراپايىم تۇرعىندار دا الەۋمەتتىك جەلىدە جازعان ۇگىت-ناسيحات سيپاتىنداعى جازباسى ءۇشىن جاۋاپكەرشىلىككە تارتىلۋى مۇمكىن.

قازاقستاندا كەزەكتەن تىس پرەزيدەنتتىك سايلاۋ 9 ماۋسىمدا وتەدى. 8 ماۋسىم – تىنىشتىق كۇنى. بيىل قر وسك جەتى كانديداتتى تىركەدى. ولاردىڭ ىشىندە «Nur Otan» پارتياسىنان قاسىم-جومارت توقاەۆ، «ۇلت تاعدىرى» ۇلتتىق-پاتريوتتىق قوزعالىسى ۇسىنعان كانديدات ءامىرجان قوسانوۆ، «اۋىل» حالىقتىق-دەموكراتيالىق پاتريوتتىق پارتياسىنان تولەۋتاي راحىمبەكوۆ، قازاقستاننىڭ كوممۋنيستەر پارتياسىنان جامبىل احمەتبەكوۆ، «ۇلى دالا قىراندارى» رەسپۋبليكالىق قوزعالىسىنان ءسادى-بەك تۇگەل، قازاقستان رەسپۋبليكاسىنىڭ كاسىپوداقتار فەدەراتسياسىنان امانگەلدى تاسپيحوۆ جانە «اق جول» قازاقستاننىڭ دەموكراتيالىق پارتياسىنان دانيا ەسپاەۆا بار.

"The Qazaq Times"