حارتۋمداعى قارۋلى كۇشتەردىڭ قىرعىنى الەم ەلدەرىن الاڭداتتى

اپتانىڭ العاشقى كۇنى سۋدان قارۋلى كۇشتەرى ورتالىق قالا حارتۋمدا نارازىلىق شەرۋىنە شىققان حالىقتى كۇشپەن باسۋعا ارەكەتتەنگەن بولاتىن. ناتيجەسىندە 60-تان استام ادام قازا تاۋىپ، جۇزدەگەن ادام جاراقات العان. سۋدان قارۋلى كۇشتەرىنىڭ بۇل ارەكەتىن الەمنىڭ بىرقاتار ەلدەرى ايىپتادى.

بىلتىر جىل سوڭىندا سۋداندا ەكونوميكالىق داعدارىستارعا بايلانىستى حالىقتىق شەرۋلەر الەۋمەتتىك تولقۋلارعا ۇلاسىپ، ەلدە ساياسي داعدارىس تۋىلدى. ناتيجەدە، ءساۋىر ايىنىڭ 11 جاڭاسىندا ەل بيلىگىن سۋدان ارمياسى ءوز باقىلاۋىنا الدى. ال، وسى دۇيسەنبىدە حارتۋمدا بولعان دەموكراتيالىق قوزعالىستار قارۋلى كۇشپەن باسىلدى.

ءبىر كۇن بۇرىن بۇۇ قاۋىپسىزدىك كەڭەسى سۋدان ماسەلەسى بويىنشا شۇعىل جينالىس وتكىزگەن بولاتىن. جەدەل جينالىستى قاۋىپسىزدىك كەڭەستىڭ تۇراقتى مۇشەلەرى بريتانيا مەن گەرمانيا شاقىرعان. بۇۇ وتىرىسىندا فرانتسيا، ۇلىبريتانيا، گەرمانيا، بەلگيا، گوللانديا، پولشا، شۆەتسيا جانە يتاليا وكىلدەرى ورتاق مالىمدەمە جاسادى. بۇۇ باس حاتشىسى سۋدان ارمياسىنىڭ قارۋلى ارەكەتىن ايىپتاپ، داعدارىستى ءتىپتى دە كۇشەيتەتىن قارۋلى ارەكەتتەردى تەز ارادا توقتاتۋعا شاقىردى.

سونداي-اق، اقش-تىڭ بۇۇ-داعى وكىلى مورگان ورتاگۋس تە سۋدان قارۋلى كۇشتەرىنە ەسكەرتۋ جاساپ، ەل بيلىگىن ازاماتتىق باسقارۋعا قايتارۋىن تالاپ ەتتى. ءارى، سۋدانداعى ۋاقىتشا اسكەري كەڭەس پەن جەدەل قولداۋ كۇشتەرىن قاقتىعىستى توقتاتۋعا شاقىرىپ، سۋدان حالقىنىڭ ءوز بيلىگىن ورناتۋ ءۇشىن دەموكراتيالىق كۇشتەرمەن ديالوگ جۇرگىزۋىن تالاپ ەتكەن.

“The Qazaq Times”