يران دەپۋتاتتارى استانانى تەگەراننان كوشىرۋدى تالاپ ەتتى

يران يسلام رەسپۋبليكاسىنىڭ استاناسى تەھراننان (تەگەران) باسقا قالاعا اۋىسۋى مۇمكىن. يرانداعى ءبىر قاتار بەدەلدى دەپۋتاتتارى ەلدىڭ رۋحاني كوسەمى اياتوللا حامەنەيگە باس قالانى اۋىستىرۋعا نۇسقاۋ بەرۋىن ءوتىنىپ، حات جولدادى. رۋحاني كوسەمدەرىنە جولدانعان حاتتا 74 دەپۋتاتتىڭ قولى قويىلعان.

يران استاناسى بولىپ كەلگەن تەھراننان باس تارتۋعا يراندىق دەپۋتاتتاردىڭ سەبەبى كوپ. ولار: قالاداعى اۋانىڭ لاستىعى; تۇرعىندار سانىنىڭ كوپتىگى; ترافيكتىڭ تىعىزدىعى; جەر سىلكىنىسى ءجيى تۋىلاتىن ءوڭىر بولۋى قاتارلى سەبەپتەردى العا تارتتى. بۇعان قوسا، قالا قۇرلىسىنىڭ اۋەلدەن كەمەلدى جوسپارلانباعانىن، ءورت، جەر سىلكىنىسى سەكىلدى اپاتتى جاعدايدا قۇتقارۋ قيمىلدارىنا قيىندىقتار تۋعىزاتىنىن دا ايتادى. دەپۋتاتتار 2013 جىلى «پلاسكو» ساۋدا ورتالىعىندا تۋىلعان ورتتە 26 ادامنىڭ قازا بولعانىن ناقتى دالەل ەتىپ كورسەتتى. رۋحاني كوسەمدەرى بۇل ۇسىنىستى دۇرىس دەپ تاپسا، پرەزيدەنت باسقارىپ وتىرعان ۇكىمەتكە پارمەن ءتۇسىرىپ، باس قالالارىن اۋىستىرۋى مۇمكىن. بۇل تۋرالى تۇركيا «انادولى» اقپاراتتىق اگەنتتىگى حابارلاپ وتىر.

تەھران (تەگەران) – يراننىڭ تاريحي ماڭىزدى قالالارىنىڭ ءبىرى. ازيا بويىنشا ەڭ ىرى قالالاردىڭ قاتارىندا. دۇنيە بويىنشا 21-ءشى ورىنداعى مەگاپوليستىڭ حالىق سانى، بەيرەسمي دەرەك بويىنشا 16 ميلليون دەپ كورسەتىلگەن. كاسپي تەڭىزىنەن 90 شاقىرىم وڭتۇستىككە ورنالاسقان. يران دەپۋتاتتارىنىڭ ەلوردانى تەھراننان باسقا قالاعا كوشىرۋ ۇسىنىسىندا ساياسي ماقساتتارى دا بار بولۋى ابدەن مۇمكىن. يران قازىر ءوز ىشىندە اسكەري تەحنيكانى دامىتىپ، باتىستان كەلەتىن قاۋىپپەن بەل شەشە كۇرەسۋگە دايىندالىپ جاتقان ەل دەۋگە بولادى. ەلورداسىن مەملەكەت تەرريتورياسىنىڭ ىشكى جاعىنا قاراي، نەمەسە وڭتۇستىك شىعىس وڭىرىنە قاراي كوشىرۋى ىقتيمال.

“The Qazaq Times”