ستولتەنبەرگ پەن وستين كەزدەستى. فوتو: AP.

اپتانىڭ العاشقى كۇنى (4 قازان) ناتو باس حاتشىسى يەنس ستولتەنبەرگ ۋاشينگتونداعى ساپارىن باستادى. بۇل ساپارىندا ول اقش پرەزيدەنتىمەن، ونىڭ قورعانىس كەڭەسشىسىمەن، اقش قورعانىس مينيسترىمەن جانە مەملەكەتتىك حاتشىسىمەن كەزدەستى. وسى كەزدەسۋلەردەگى ەڭ نەگىزگى تاقىرىپ قىتايدىڭ ارتىپ كەلە جاتقان قاۋىپ-قاتەرى الدىندا ناتو-نىڭ قالاي ارەكەت ەتۋى ەدى.

ۋاشينگتونداعى ساپارىنان بۇرىن سترولتەنبەرگ قىتاي ءسىم باسشىسى ۋاڭ يمەن ونلاين-تالقى وتكىزگەن بولاتىن. ەكەۋ اراسىنداعى ديالوگتا ناتو مەن قىتاي قاتىناسى تۋرالى بىرقاتار ماسەلەلەر ءسوز بولعان. قىتاي سىرتقى ىستەر ءمينيسترى سوزىندە ناتو-عا مۇشە كەيبىر ەلدەردىڭ قىتايعا جاقىن تەڭىز ايدىندارىندا اسكەري كەمەلەرىن جىبەرگەنىن ايىپتادى جانە ناتو اۋەلگى گەوگرافيالىق اۋماعىنان شىقپاۋى كەرەك» دەگەن  ويىن ايتقان. بەيجىڭنىڭ رەسمي ۇستانىمى سانالعان بۇل پىكىر ناتو ءۇشىن اسا ماڭىزدى بولعانى ءسوزسسىز.

ال، اقش-قا جاساعان بۇل ساپارىندا ناتو باس حاتشىسى قىتايدىڭ قاۋىپسىزدىككە توندىرەتىن قاتەرلەرى الدىندا ۇيىمنىڭ  ستراتەگيالىق جوسپارلارىن ەڭ ىقپالدى مۇشە ەلمەن بىرگە تالقىلاپ بەلگىلەۋدى ماقسات ەتتى.

ۇيىم جەتەكشىسىمەن كەزدەسكەن قۇراما شتات لاۋازىمدىلارى تولىقتاي ناتو-نىڭ قاۋىپسىزدىكتى قامتاماسىز ەتۋدەگى ماڭىزدىلىعىن جوعارى باعالادى. بىلايشا ايتقاندا ۋاشينگتون پرەزيدەنت ترامپ كەزىندەگىدەي ناتو-دان تەرىس اينالمايتىنى انىق بولدى. سوعان قوسا، پەنتاگوننىڭ قازىرگى باسشىسى وستين اقش ۇيىمعا ينۆەستيتسيا سالۋدى جالعاستىراتىنىن دا ايتتى، ءارى ول ناتو ءۇشىن ستراتەگيالىق وي-جوسپارلارىن جاڭارتۋ كەرەكتىگىن باسا ايتقان.

سونىمەن، ناتو مەن ونىڭ ەڭ ماڭىزدى ءارى قۋاتتى اسكەري كۇشكە يە مۇشەسىنىڭ لاۋازىمدى تۇلعالارى اراسىنداعى كەزدەسۋدەن كەيىن ناتو-نىڭ جاھاندىق ارەكەت ەتۋ ستراتەگياسى جاڭارادى دەپ تۇسىنە بەرسەك تە بولادى. سەبەبى، كەڭەس وداعى قۇلاعاننان كەيىن ناتو كوبىنە شىعىس ەۋروپادا بەلسەندى بولىپ، ماسكەۋدىڭ اسكەري اگرەسسياسىنا جاۋاپ بەرۋگە نازار اۋدارىپ كەلگەن. الايدا، قىتاي سىندى جاڭا دەرجاۆا الەم ساحناسىنا كوتەرىلىپ، اسا ماڭىزدى ستراتەگيالىق جۇرىستەر ءۇندى جانە تىنىق مۇحيتى ايماعىنا قاراي ويىستى. قالىپتاسقان جاعداي الەمدەگى ەڭ ءىرى قاۋىپسىزدىك ۇيىمىن جاڭا ستراتەگيا بەكىتۋگە ءماجبۇر ەتتى.

The Qazaq Times