ترامپتىڭ بريتانياداعى العاشقى ساپارى. فوتو: VOA.

اقش پرەزيدەنتى دونالد ترامپ 3 ماۋسىم كۇنى انگليا پاتشايىمىنىڭ شاقىرۋىمەن بريتانياداعى مەملەكەتتىك ساپارىن باستايدى.  اق ءۇيدىڭ مالىمەتىندە، ترامپتىڭ كەزەكتى مەملەكەتتىك ساپارى ەكى ەل اراسىنداعى "بەكەم ءارى ايرىقشا قارىم-قاتىناستى" راستايتىنىن ايتقان. دەگەنمەن، ترامپتىڭ بريتانيا ساپارى ۇلكەن كەزدەسۋلەر عانا ەمەس، كوپتەگەن نارازىلىقتارعا دا تولى بولماق.

بريتان پاتشايىمى ەليزاۆەتا II 3 ماۋسىم كۇنى اقش پرەزيدەنتى مەن ونىڭ حانىمى مەلانيا ترامپتى قابىلدايدى.    پرەزيدەنت ترامپ بىلتىرعى رەسمي ساپارى كەزىندە دە بريتان پاتشايىمىمەن كەزدەسكەن بولاتىن. بىرىككەن كورولدىك ترامپ اق ۇيدەگى لاۋازىمدى قىزمەتىنە وتىرا سالىسىمەن مەملەكەتتىك ساپارمەن كەلۋگە شاقىرعان. الايدا، قاۋىپسىزدىك جانە باسقا دا سەبەپتەرمەن ساپار كەيىنگە قالدىرىلىپ كەلگەن بولاتىن. سىرتقى بايلانىستار جونىندەگى كەڭەستىڭ توراعاسى چارلز كۋپكاننىڭ ايتۋىنشا، بىردە جوسپارعا ەنگىزىلىپ، بىردە كۇشىنەن قالدىرىلعان ترامپتىڭ مەملەكەتتىك ساپارى داۋ-دامايعا دا مۇرىندىق بولعان.

پرەزيدەنت ترامپ بۋكينگەم سارايىندا مەملەكەتتىك بانكەتكە قاتىسادى جانە ۇلىبريتانيا پرەمەر-ءمينيسترى تەرەزا مەيمەن ەكىجاقتى كەلىسسوزدەر جۇرگىزەدى. ال، اقش پرەزيدەنتىمەن كەزدەسۋدەن كەيىن تەرەزا مەي تولىقتاي وتستاۆكاعا كەتەدى. ول وسىدان بۇرىن بريتانيانىڭ ەو-دان قول ءۇزۋ پروتسەسىن جۇزەگە اسىرا الماعان ەدى.

ترامپتىڭ بىلتىرعى بريتانيا ساپارى كەزىندە لوندون جانە باسقا دا قالالاردا 100 مىڭداعان ادام نارازىلىق اكتسياسىن وتكىزگەن ەدى. بىلتىرعى نارازىلىق اكتسياسىن ۇيىمداستىرۋشىلار بيىل دا بەلسەندى دايىندىق ۇستىندە. بيىل دا ماسشتابتى نارازىلىق شەرۋلەرىن ۇيىمداستىرماق. ولار ترامپتىڭ ميگراتسيا جانە سىرتقى ساياساتىنا، سونداي-اق، عالامدىق جىلىنۋدىڭ الدىن الۋ شارالارىن توقتاتقانىنا نارازى.

“The Qazaq Times”