Tramptıñ Britaniyadağı alğaşqı saparı. Foto: VOA.

AQŞ prezidenti Donal'd Tramp 3 mausım küni Angliya patşayımınıñ şaqıruımen Britaniyadağı memlekettik saparın bastaydı.  Aq üydiñ mälimetinde, Tramptıñ kezekti memlekettik saparı eki el arasındağı "bekem äri ayrıqşa qarım-qatınastı" rastaytının aytqan. Degenmen, Tramptıñ Britaniya saparı ülken kezdesuler ğana emes, köptegen narazılıqtarğa da tolı bolmaq.

Britan patşayımı Elizaveta II 3 mausım küni AQŞ prezidenti men onıñ hanımı Melaniya Tramptı qabıldaydı.    Prezident Tramp bıltırğı resmi saparı kezinde de Britan patşayımımen kezdesken bolatın. Birikken Korol'dik Tramp Aq üydegi lauazımdı qızmetine otıra salısımen memlekettik saparmen keluge şaqırğan. Alayda, qauipsizdik jäne basqa da sebeptermen sapar keyinge qaldırılıp kelgen bolatın. Sırtqı baylanıstar jönindegi keñestiñ törağası Çarl'z Kupkannıñ aytuınşa, birde josparğa engizilip, birde küşinen qaldırılğan Tramptıñ memlekettik saparı dau-damayğa da mwrındıq bolğan.

Prezident Tramp Bukingem sarayında memlekettik banketke qatısadı jäne Wlıbritaniya Prem'er-Ministri Tereza Meymen ekijaqtı kelissözder jürgizedi. Al, AQŞ prezidentimen kezdesuden keyin Tereza Mey tolıqtay otstavkağa ketedi. Ol osıdan bwrın Britaniyanıñ EO-dan qol üzu procesin jüzege asıra almağan edi.

Tramptıñ bıltırğı Britaniya saparı kezinde London jäne basqa da qalalarda 100 mıñdağan adam narazılıq akciyasın ötkizgen edi. Bıltırğı narazılıq akciyasın wyımdastıruşılar biıl da belsendi dayındıq üstinde. Biıl da masştabtı narazılıq şerulerin wyımdastırmaq. Olar Tramptıñ migraciya jäne sırtqı sayasatına, sonday-aq, ğalamdıq jılınudıñ aldın alu şaraların toqtatqanına narazı.

“The Qazaq Times”