سەربيا كوسوۆوعا قارسى اسكەري جاعداي ەنگىزدى

سوڭعى كۇندەرى سەربيا مەن كوسوۆو اراسىنداعى جانجال ۋشىعا تۇسكەن. كوسوۆودا ونداعان سەرب تۇتقىنعا الىنعاننان كەيىن سەربيا پرەزيدەنتى الەكساندر ۆۋچيچ اسكەرگە كەز كەلگەن قاقتىعىسقا دايىن بولۋعا بۇيرىق بەردى. 

Associated Press اگەنتتىگىنىڭ حابارلاۋىنشا، وسى اپتادا كوسوۆودا قىزمەت ەتەتىن سەرب پوليتسەيلەرى مەن بىرنەشە بەيبىت تۇرعىن تەمىر تورعا قامالعان. جاتالعان جايتتان سوڭ، جەرگىلىكتى تەلەارنالاردىڭ بىرىنە سۇحبات بەرگەن الەكساندر ۆۋچيچ كوسوۆونى بۇدان ءارى باقىلاۋدا ۇستاۋ مۇمكىن ەمەس جانە سەربيا تاراپى قاقتىعىسقا ساقاداي ساي تۇرۋى قاجەت دەپ مالىمدەگەن. ۆۋچيچ سوزىندە: «كوسوۆو مەن مەتوحياعا قاتىستى ماسەلەنىڭ شەشىلەر ءتۇرى جوق، ءتىپتى بۇعان قاتىستى ديالوگ قوزعالمادى. مۇنى الباندىقتارمەن كەلىسىمگە كەلۋدىڭ ماڭىزىن ەسكەرتۋ ءۇشىن ايتىپ وتىرمىن. الباندىقتارمەن كەلىسىم ورناتىلماسا، ولار شابۋىلعا كوشۋى مۇمكىن»، – دەدى. ال كوسوۆو پرەزيدەنتى حاشيم تاچي: «اقش-تىڭ قاتىسۋىنسىز سەربيامەن ەشبىر كەلىسسوز جۇرگىزە المايمىز. ويتكەنى بۇل ماسەلەدە ەۋروپانىڭ دا ويى ءبىر جەردەن شىقپاي جاتىر. ۇستانىمدارى ءار قيلى ەۋروپا ەلدەرى الدىمەن وزدەرى ورتاق شەشىمگە كەلۋى ءتيىس. سودان كەيىن عانا باتىس بالقانداعى تۇيتكىلدى شەشۋگە كومەكتەسە الادى»، – دەيدى.

رەسمي تۇردە مويىندالماعان كوسوۆونىڭ ارنايى جاساعى سەربتەر تۇراتىن سولتۇستىكتەگى ايماققا باسىپ كىرىپ، اتىس ۇيىمداستىرعان. تاسس اگەنتتىگىنىڭ مالىمەتى بويىنشا، اتىس كەزىندە ەكى سەرب جاراقات الىپ، 23 ادام تۇتقىنعا الىندى. كوسوۆوعا قاراستى ميتروۆيتسا قالاسىنىڭ سولتۇستىگىندە ەتنيكالىق سەربتەر شوعىرلانعاندىقتان، سەربيا پرەزيدەنتى الەكساندر ۆۋچيچ ۇكىمەتتە شۇعىل جيىن ۇيىمداستىرىپ، اسكەردى توتەنشە جاعدايعا دايىن بولۋعا شاقىردى. ناتو-عا قاراستى حالىقارالىق ميسسيا وكىلدەرى بۇل وپەراتسيانىڭ ۇلتارازدىققا ەش قاتىسى جوق دەيدى. ميسسيانىڭ ءباسپاسوز حاتشىسى كوسوۆونىڭ ءتارتىپ ساقشىلارى جەمقورلىققا قارسى شارانى ىسكە اسىرىپ جاتىر دەيدى. وسى رەتتە كوسوۆو مەن مەتوحياداعى ناتو-عا قاراستى حالىقارالىق ميسسيانىڭ ءباسپاسوز حاتشىسى ۆينچەنتسو گراسو: «كوسوۆو پوليتسياسى سولتۇستىكتە عانا ەمەس، تۇتاس كوسوۆودا وپەراتسياسىن جۇرگىزىپ جاتىر. بۇل شارانى سەربتەرگە قارسى ۇيىمداستىرىلدى دەۋ – قاتە. ول – قىلمىسقا قاتىسى بار ادامدارعا قارسى وتكىزىلىپ جاتقان وپەراتسيا. جاعدايدى باقىلاۋىمىزدا ۇستاپ وتىرمىز. پريشتينا اكىمشىلىگىمەن دە، سەربيا تاراپىمەن دە بايلانىستامىز»، – دەپ حابارلادى. تۇتقىنداعىلاردىڭ قاتارىندا بۇۇ ميسسياسىنىڭ كوسوۆوداعى ۋاقىتشا اكىمشىلىك ءىسى جونىندەگى قىزمەتكەرى، رەسەيلىك ازاماتتىڭ بار ەكەندىگى ءمالىم بولعاننان كەيىن، رەسەي تاراپى ونى دەرەۋ بوساتۋدى تالاپ ەتىپ وتىر.

ەتنيكالىق البانداردىڭ سەربيالىق قارۋلى كۇشتەردىڭ قولىنان قازا تابۋ جاعدايى كوبەيىپ كەتىپ، ناتو 1999 جىلى 11 اپتا بويى بالقان ەلىن بومبالاعاننان كەيىن كوسوۆو سەربيادان ءبولىنىپ شىقتى. ون جىلعا سوزىلعان سوعىس ناتيجەسىندە سەربيانىڭ كوسوۆو جانە مەتوحيا اۆتونومدىق ايماعى 2008 جىلى ءوزىنىڭ تاۋەلسىزدىگىن جاريالادى. 2010 جىلى بۇۇ-نىڭ حالىقارالىق سوتى ونى دەربەس مەملەكەت رەتىندە تانىدى. دەگەنمەن، 60-تان استام مەملەكەت كوسوۆونى تاۋەلسىز ەل رەتىندە ءالى كۇنگە دەيىن مويىنداعان جوق. بىلتىر قاراشادا كوسوۆو كەدەندىك تاۋار سالىعىن 100%-عا ءوسىرىپ، داۋدى ودان ارى ۋشىقتىرا تۇسكەن. سەربيا بيلىگى كوسوۆو سالىق جۇيەسىنەن باس تارتپايىنشا، ەشقانداي كەلىسسوز جۇرگىزبەيتىنىن ەسكەرتتى.

ەكى ەلدىڭ ارا قاتىناسىن ءجىتى نازارعا ۇستاعان انگەلا مەركەل مەن ەممانۋەل ماكرون بىرلەسىپ ساۋىردە ارنايى سامميت وتكىزگەن. جيىن قوس تاراپتىڭ ءوزارا ديالوگ قۇرۋىنا باعىتتالعانمەن، ايتارلىقتاي ناتيجە بولعان جوق. كوسوۆو تاراپى بۇل ىسكە ەۋروپانىڭ عانا ەمەس، اقش-تىڭ دا نازار سالعانىن قالايدى. دەمەك، تاياۋ كۇندەرى پريشتينا مەن بەلگرادتىڭ بەيبىت كەلىسىمگە كەلۋى ەكىتالاي.

"The Qazaq Times"