جاپونيا كيبەر-قاۋىپسىزدىكتى قامتاماسىز ەتۋ ماقساتىندا تامىز ايىنان باستاپ اقپاراتتىق تەحنولوگيالار سالاسى مەن تەلەكوممۋنيكاتسيا يندۋسترياسىنا شەتەلدىك ينۆەستيتسيالاردى شەكتەيتىنىن ءبىلدىردى. بۇنداي مالىمدەمەنى جاپونيانىڭ، قارجى، ەكونوميكا، ساۋدا جانە يندۋستريا، ىشكى ىستەر مەن اقپارات جانە تەلەكوممۋنيكاتسيا قاتارلى بىرقاتار مينيسترلىكتەرى بىرلەسە جاسادى. 

جاپون ۇكىمەتى جاريالاعان تەحنولوگيالار مەن تەلەكوممۋنيكاتسيالىق قۇرىلعىلار تۋرالى جاڭا نورماتيۆتىك اكتىلەردە جاد ميكروسحەمالارىن ءوندىرۋ، باعدارلامالىق جاساقتاما ازىرلەۋ جانە كوممۋنيكاتسيالىق جابدىقتى ءوندىرۋ سياقتى 20 استام تەحنولوگيالىق سالا قامتىلعان. ياعني، جاپونيا بيلىگى تامىزدان باستاپ وسى سالالارداعى شەتەلدىك ينۆەستيتسيالاردى شەكتەيدى. مينيسترلىكتەردىڭ بىرلەسكەن مالىمدەمەسىندە: "سوڭعى جىلدارى كيبەر-قاۋىپسىزدىكتى قامتاماسىز ەتۋدىڭ ماڭىزدىلىعى اراتا ءتۇستى. سونى ەسكەرە وتىرىپ، جاپونيانىڭ ۇلتتىق قاۋىپسىزدىگىنە تونەتىن قاتەرلەردىڭ الدىن الۋ ماقساتىندا، ينتەگرالدى سحەمالاردى ءوندىرۋدى قامتىعان قاجەتتى شەكتەۋ شارالارىن قولدانۋدى ءجون كوردىك", – دەلىنگەن.

ءبىر سوزبەن ايتقاندا جاپونيا ۇلتتىق قاۋىپسىزدىككە تىكەلەي اسەر ەتەتىن تەحنولوگيالارعا شەتەلدى ارالاستىرۋعا تولىقتاي شەكتەۋ قويۋعا تىرىسۋدا. مالىمدەمەدە، شەكتەۋگە ۇشىراعان شەتەلدىك كومپانيالاردىڭ ءتىزىمى تۋرالى مالىمەت بەرىلمەگەن. بىراق، جاڭا ەرەجەنىڭ 1 تامىزدان باستاپ اتقارىلاتىنىن ەسكەرتكەن.

ايتا كەتەرلىگى، وسى مالىمدەمە جاريالانعان كۇنى جاپونيادا مەملەكەتتىك ساپاردا جۇرگەن اقش پرەزيدەنتى دونالد ترامپ پەن جاپونيا باس ءۋازىرى (پرەمەر-ءمينيسترى) شينزو ابە ساۋدا-ەكونوميكالىق جانە وزگە دە ماسەلەلەر تۋرالى كەلىسسوز وتىرىسىن وتكىزگەن بولاتىن. ال، قۇراما شتات تارابى كوپتەن بەرى قىتايدىڭ تەلەكوممۋنيكاتسيا الىبى Huawei كومپانياسى الەم ەلدەرىنىڭ ۇلتتىق قاۋىپسىزدىگىنە قاتەر توندىرەتىنىن ەسكەرتىپ كەلگەن. اقش تارابى اتالعان قىتايلىق كومپانيانى قىتاي كوممۋنيستىك پارتياسىمەن قۇپيا تىعىز بايلانىستا ەكەنىن، قىتايدىڭ ۇلتتىق مۇددەسى ءۇشىن قىزمەت ىستەيتىنىن العا تارادى. الايدا، بەيجىڭ بيلىگى مەن Huawei كومپانياسى بۇل ايىپتى جوققا شىعارىپ كەلەدى.

جاپونيانىڭ اتالعان جاڭا شەشىمگە جاپونيا مەن اقش ليدەرلەرىنىڭ كەلىسسوز كەزدەسۋلەرى وزىندىك اسەر ەتكەنى انىق. قازىرگى جاپونيانىڭ "ۆاليۋتا جانە سىرتقى ساۋدا" تۋرالى زاڭىنا سايكەس، ۇشاق جاساۋ، يادرولىق قوندىرعىلاردى ءوندىرۋ جانە قارۋ-جاراق ءوندىرىسى سەكىلدى ماڭىزدى سالالارداعى شەتەلدىك ينۆەستورلاردى باقىلاۋدا، ۇكىمەت تارابى جاپونيانىڭ ۇقساس سالاداعى كومپانيالارىنىڭ  ەڭ از بولعاندا 10 پايىز اكتسياسىن ساتىپ الۋىن تالاپ ەتەدى. نە بولماسا، ليستينگىلىك كومپانيالاردىڭ اكتسيالارىن ساتىپ العان كەزدە ول جاپونيا ۇكىمەتىنە ساتىپ الۋ تۋرالى حابارلاۋى كەرەك دەگەن ەرەجەلەرى بار. ەگەر ولاردىڭ جوباسى ۇلتتىق قاۋىپسىزدىككە زالال كەلتىرەتىن بولسا، ۇكىمەت ولاردىڭ جوباسىن وزگەرتۋگە نەمەسە كۇشىنەن قالدىرۋعا تاپسىرما بەرە الادى.

جاپونيا ۇكىمەتى جاڭا ەرەجەلەر ارقىلى بارعان سايىن ارتىپ كەلە جاتقان قىتاي كومپانيالارىنىڭ تەحنولوگيالىق مۇمكىندىكتەرىنە جول بەرمەۋدى قاراستىرۋدا. سالىستىرا قاراعاندا، الەمدە تەحنولوگياسى دامىعان ەلدەردىڭ ءوزى دە قىتايدىڭ ۇلتتىق قاۋىپسىزدىككە توندىرەتىن قاتەرىنەن كوبىرەك الاڭداۋدى.

“The Qazaq Times”